លោកនាយករដ្ឋមន្ត្រី ហ៊ុន សែន បានអះអាងថា ការរើសអើងជនពិការនៅតែបន្តកើតមាន ដោយថាសូម្បីតែរូបលោក ក៏កំពុងទទួលរងនូវការប្រមាថ ពីមនុស្សមួយក្រុមដែរ ដែលលោកហៅអ្នកទាំងនោះថា ជាពួកតិរច្ឆាន។
លោក ហ៊ុន សែន ថ្លែងប្រាប់ក្រុមកីឡាករជនពិការ ក្នុងជំនួបមួយនៅរាជធានី នាថ្ងៃទី១៨ខែសីហានេះថា ជនពិការគ្រប់រូបមិនត្រូវអស់សង្ឃឹមក្នុងជីវិតទេ។
លោក ហ៊ុន សែន ថ្លែងទៀតថា រូបលោកជាអ្នកពិការមួយរូបមែន ប៉ុន្តែលោកថា លោកបានរំដោះប្រទេសពីរបបមានផ្ទះអត់មនុស្សនៅ មានផ្លូវអត់មនុស្សដើរ កសាងប្រទេសរហូតមានការរីកចម្រើនដូចបច្ចុប្បន្ន។ លោក ហ៊ុន សែន បន្តថា ទោះជាបែបនេះក្តី ពួកតិរច្ឆានមួយចំនួន នៅតែប្រមាថរូបលោកពីពិការភាពនេះ។
លោកថា៖ «បើទោះបីជាយើងពិការសេរីរាង្គ ប៉ុន្តែយើងមិនបានពិការផ្លូវចិត្តនោះទេ។ ហើយខ្ញុំចង់ការពារជនពិការទាំងឡាយពីការប្រមាថពីសំណាក់អ្នកដទៃ។ ខ្ញុំទទួលការប្រមាថច្រើនណាស់ហើយ ហើយខ្ញុំក៏កំពុងទទួលការប្រមាថពីពួកតិរច្ឆាន ដែលធ្លាប់បានបន្តប្រមាថមក ចំពោះខ្ញុំពាក្យអាខ្វាក់ ពាក្យអាកម្បុត ពាក្យអាក្បាក់ ពាក្យអាគ អាថ្លង់ គឺជាពាក្យប្រមាថធ្ងន់ធ្ងរណាស់ ដែលសូម្បីជាព្រះជាម្ចាស់ ក៏មិនអាចអត់អោនឲ្យបានដែរ»។
ទោះជាយ៉ាងណា ក្នុងវិធីនោះ លោក ហ៊ុន សែន បានឧបត្ថម្ភប្រាក់មួយចំនួន ដល់កីឡាករជនពិការដែលទទួលបានជ័យលាភី និងផ្តល់ប្រាក់ឧបត្ថម្ភដល់កីឡាករ ដែលត្រៀមចេញទៅប្រកួត ព្រមទាំងថ្លែងបែបលើកទឹកចិត្តថា លោកនឹងនៅតែបន្តជួយជ្រោមជ្រែងដល់ជនពិការ ដើម្បីឲ្យពួកគេអាច ពង្រឹងជំនាញ មានវិជ្ជាជីវៈ មានប្រាក់ចំណូលសម្រាប់បចិញ្ចឹមជីវិត បានដូចមនុស្សដែលមានកាយសម្បទាមាំមួនដែរ៕
