នាយករដ្ឋមន្ត្រីវៀតណាម​ជំរុញឲ្យមន្ត្រីធ្វើកំណែទម្រង់របៀបធ្វើការងារបន្ទាន់​

នាយករដ្ឋមន្ត្រីរបស់វៀតណាម​បានបញ្ជាឲ្យមានការរៀបចំធ្វើកំណែទម្រង់របៀបរបបធ្វើការងារជាបន្ទាន់ ដើម្បីបង្កើនប្រសិទ្ធភាពការងារ និងងាយស្រួលសហការជាមួយវិស័យឯកជន អភិវឌ្ឍសេដ្ឋកិច្ចជាតិឲ្យមានការរីកចម្រើន​បានឆាប់រហ័ស។​

នាយករដ្ឋមន្ត្រីវៀតណាម​ លោក​ ង្វ្រៀន សួន​ផុក បានថ្លែងនៅថ្ងៃសុក្រនេះថា រដ្ឋបាលរបស់លោក​មានការចោទថា បំពេញការងារមានលក្ខណៈយឺតយ៉ាវ ធ្វើឲ្យខាតពេលវេលានិងទ្រព្យសម្បត្តិ ទើបលោក​ជំរុញឲ្យ មានការធ្វើកំណែទម្រង់ជាបន្ទាន់​ទាំងផ្នែកការងារសាធារណៈការងារជាមួយវិស័យឯកជន។ ​នេះបើតាមសារព័ត៌មាន Vietnam News។​

នាយករដ្ឋមន្ត្រីរូបនេះថ្លែងថា ត្រូវមានការធ្វើការងារជាមួយនាយករដ្ឋានគ្រប់គ្រង់ទម្រងការងាររដ្ឋាភិបាល និង ក្រុមប្រឹក្សាកំណែទម្រង់ការងាររដ្ឋបាល​ថា ត្រូវតែកាត់បន្ថយការងារទាំងឡាយណាដែលបង្កភាពស្មុគស្មាញ រាំងស្ទះដល់ការងារ។​

លោក ង្វ្រៀន សួនផុក ក៏បានស្នើឲ្យបង្កើនប្រសិទ្ធភាពនៃការប្រមូលពន្ធ និង ការត្រួតពិនិត្យលើករបៀបធ្វើការងារបែបប្រពៃណី៕