ក្រុមអ្នកធ្វើដំណើរមួយចំនួន បានត្អូញត្អែរពីការដំឡើងថ្លៃសេវារថយន្តឈ្នួលខុសប្រក្រតី ឬខុសពីថ្ងៃធម្មតា នៅរដូវបុណ្យជាតិធំៗ ជាពិសេសនៅក្នុងអំឡុងបុណ្យភ្ជុំបិណ្ឌនេះ ខណៈអ្នកឃ្លាំមើល បានរិះគន់រដ្ឋាភិបាល ថា ហាក់គ្មានយន្តការដោះស្រាយឲ្យមានប្រសិទ្ធភាព។
យុវតី គង់ សំបូរ ជិះរថយន្តឈ្នួលនៅម្តុំផ្សារដើមគរ បានរៀបរាប់ប្រាប់អ្នកសារព័ត៌មាននៅថ្ងៃទី១៨ ខែកញ្ញានេះថា គាត់ជិះរថយន្តឈ្នួលពីភ្នំពេញទៅខេត្តកំពត ប្រជ្រៀងគ្នា ដោយមួយនាក់តម្លៃ ២០ ០០០រៀល ខណៈថ្ងៃធម្មតា១០០០០រៀលតែប៉ុណ្ណោះ។ យុវតីរូបនោះអះអាងថា គាត់សម្រេចិត្តជិះទៅស្រុកំណើត ដោយសារគ្មានជំរើស។
កញ្ញាអះអាងថា៖ «តម្លៃធម្មតា១០០០០រៀល ដល់បុណ្យទានគាត់យក២០០០០រៀល អន់ចិត្តដែរ ប៉ុន្តែមិនធ្វើម៉េច ថ្ងៃបុណ្យ ថ្ងៃទានគាត់ត្រូវយកអញ្ចឹង អត់មានជំរើសជិះ ណាមួយចឹងទៀត ត្រូវតែជិះ»។
អ្នកធ្វើដំណើរតាមក្រុមហ៊ុន ពន្លឺអង្គរខ្មែរ លោក អោម សុភា បានឲ្យដឹងដែរថា លោកទិញសំបុត្រធ្វើដំណើរនៅក្រុមហ៊ុននេះ ពីភ្នំពេញទៅខេត្តបាត់ដំបង លោកថា សំបុត្រមួយតម្លៃ ៤០ ០០០រៀល ដោយថាថ្ងៃធម្មតាត្រឹមតែ ១៨ ០០០រៀល តែប៉ុណ្ណោះ។
លោក អោម ថា ការដំឡើងថ្លៃសំបុត្ររថយន្តក្រុងនេះ ធ្វើឲ្យប៉ះពាល់ដល់អារម្មណ៍ នឹងការចំណាយក្នុងគ្រួសារ។
លោកនិយាយថា៖ «លុយយើងតិចផង ដ៏ពេលធ្វើសោហ៊ុយថ្លៃឡានថ្លៃ វាពិបាកដែរ វាប៉ះពាល់ថា យើងទៅ យើងទិញអីវ៉ាន់ផ្ញើទៅ ដ៏ពេលចឹងយើងអត់បានទិញ យើងបានទិញតិចតួច ដូចរបស់យើងត្រូវទិញ៣គីឡូ ៤គីឡូ យើងបានទិញតែ១គីឡូ ដ៏ចឹងចែកចាយបងប្អូនអត់គ្រាន់ទេ»។
អ្នកធ្វើដំណើរភាគច្រើននៅម្តុំផ្សារដើមគរ អូរឡំាពិច ក្បាលថ្នល់ ផ្សារថ្មី និងផ្សារសុរិយាជាដើម បានអះអាងប្រហាក់ប្រហែលគ្នាថា ជារៀងរាល់ឆ្នាំ ជាពិសេសឆ្នាំនេះ ម្ចាស់រថយន្តក្រុង និងរថយន្តឈ្នួលនៅតែដំឡើងថ្លៃសំបុត្រក្នុងមួយនាក់ ចាប់ពី ៥០០០រៀល រហូតដល់ ២០ ០០០រៀល។
ភ្លាម VOD បានចុះសួរបុគ្គលិកក្រុមហ៊ុនដឹកអ្នកដំណើរ រួមទំាងអ្នកបើករថយន្តឈ្នួលជុំវិញករណីដែរ ប៉ុន្តែពួកគេថា ជាប់រវល់ជាមួយភ្ញៀវ។
សាលារាជធានីភ្នំពេញ បានចេញសេចក្ដីជូនដំណឹងមួយចុះថ្ងៃទី១៦ ខែកញ្ញា ដោយអំពាវនាវយ៉ាងទទូចជាថ្មីទៀត កុំឲ្យម្ចាស់រថយន្តឈ្នួលដំឡើងថ្លៃធ្វើដំណើរក្នុងបុណ្យភ្ជុំបិណ្ឌខាងមុខនេះ ដោយថា ដើម្បីសម្រាលទុក្ខលំបាករបស់ប្រជាពលរដ្ឋ និងក្រុមកម្មករ។
សេចក្ដីជូនដំណឹងដដែល ក៏បន្តអំពាវនាវដល់ម្ចាស់ក្រុមហ៊ុនដឹកជញ្ជូនឯកជនទាំងអស់ ឲ្យណែនាំដល់បុគ្គលិករបស់ខ្លួន កុំឲ្យផ្ទុកអ្នកដំណើរលើសចំណុះ និងបើកបរដោយគោរពច្បាប់ចរាចរណ៍។ សម្រាប់អ្នកដំណើរវិញ សាលារាជធានីថា ពួកគេត្រូវជៀសវាងការជិះប្រជ្រៀតគ្នា ឬជិះលើដំបូលរថយន្ត ដើម្បីកុំឲ្យកើតមានគ្រោះថ្នាក់ជាយថាហេតុ។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ សង្កេតឃើញថា សេចក្តីជូនដំណឹងរបស់រដ្ឋាភិបាលជារៀងរាល់ឆ្នាំ ដែលសុំឲ្យម្ចាស់ក្រុមហ៊ុនដឹកអ្នកដំណើរ និងម្ចាស់រថយន្តឈ្នួលកុំដំឡើងថ្លៃ មិនមានប្រសិទ្ធិភាពនោះទេ ដោយលោកថា អ្នកបើអាជីវកម្ម និងប្រកបមុខរបរទំាងនោះសុទ្ធតែមានខ្សែស្រឡាយអ្នកមានអំណាច។
លោក សន ជ័យ ផ្តល់ជាអនុសាសន៍ថា ដើម្បីដោះស្រាយបញ្ហានេះ ឲ្យមានប្រសិទ្ធិភាពរដ្ឋាភិបាលត្រូវបានបង្កើតរថយន្តក្រុងដឹកអ្នកដំណើរ ពីភ្នំពេញទៅតាមបណ្តាខេត្តនានា ទើបទទួលបានផលវិជ្ជមាន។
លោកមានប្រសាសន៍ថា៖ «ក្រសួងសាធារណការ និងដឹកជញ្ជូន គួរតែគិតគូរៀបចំឲ្យមានឡានក្រុងរបស់រដ្ឋសម្រាប់ដឹកជញ្ជូន[អ្នកដំណើរ]ទៅតាមបណ្តាខេត្ត វាជួយច្រើនដល់ប្រជាពលរដ្ឋ ដែលមានជំណូលទាប វាមិនមែនតែរដូវភ្ជុំបិណ្ឌ ចូលឆ្នាំ ឬក៏រដូវ ដែលមានការធ្វើដំណើរឡើងខ្ពស់ទេ សូម្បីតែនៅក្នុងរដូវកាលធម្មតា ក៏គេមានមធ្យបាយនិងដែរ ធ្វើឲ្យពួកគេមានជំរើស ប្រជាពលរដ្ឋចង់ទៅជិះឡានក្រុងរបស់រដ្ឋ តម្លៃវាអាចមានការថេរឬក៏ថោកជាង[ក្រុមហ៊ុន]ឯកជន ហើយបើអ្នកមានគេជិះឯកជនទៅ»។
គួរបញ្ជាក់ថា នៅពេលរដូវបុណ្យទានម្តងៗ ប្រជាពលរដ្ឋ ដែលត្រូវធ្វើដំណើរទៅស្រុកកំណើត តែងតែរអ៊ូរទាំចំពោះការឡើងថ្លៃឈ្នួលរថយន្ត។ ចំណែករដ្ឋាភិបាល និងសាលារាជធានីភំពេញ ជារៀងរាល់ឆ្នាំ តែងតែអំពាវនាវកុំឲ្យមានការដំឡើងថ្លៃធ្វើដំណើរ។ ទោះយ៉ាងណា ការអំពាវនាវនោះមិនមានប្រសិទ្ធភាពនោះទេ ដោយថ្លៃឈ្នួលរថយន្ត នៅតែឡើងថ្លៃដដែល៕