សមាគមរោងចក្រកាត់ដេរកម្ពុជា ហៅកាត់ថា GMAC ស្នើសុំរដ្ឋាភិបាលអាមេរិក អនុគ្រោះពន្ធលើផលិតផលស្បែកជើងពីកម្ពុជា ក្នុងពេលដែលរដ្ឋាភិបាលអាមេរិក កំពុងពិនិត្យឡើងវិញនូវកម្មវិធីអនុគ្រោះពន្ធមួយ នៅចុងឆ្នាំនេះ។
ប្រព័ន្ធអនុគ្រោះពន្ធទូទៅរបស់សហរដ្ឋអាមរិក ឬ GSP គឺជាកម្មវិធីអនុគ្រោះពន្ធពាណិជ្ជកម្ម ដោយមិនមានការបង់ពន្ធសម្រាប់ការនាំចូលទំនិញ ពីប្រទេសកំពុងអភិវឌ្ឍន៍ និងប្រទេសក្រីក្រទៅកាន់សហរដ្ឋអាមេរិក។
ក្នុងសេចក្តីប្រកាសព័ត៌មានចុះថ្ងៃទី១៧តុលាម្សិលមិញ សមាគមរោងចក្រកាត់ដេរនៅកម្ពុជា ឲ្យដឹងថា សមាគមបានដាក់ញាត្តិរបស់ខ្លួន ទៅកាន់រដ្ឋាភិបាលអាមេរិក ដើម្បីស្នើសុំអនុគ្រោះពន្ធនេះ ដោយសង្ឃឹមថា នឹងទទួលបានការឆ្លើយតបជាវិជ្ជមាន។
បើតាម GMAC ប្រសិនជាកម្ពុជា ទទួលបានការលើកលែងពន្ធនេះ មែននោះ វានឹងផ្តល់អត្ថប្រយោជន៍ច្រើនដល់សេដ្ឋកិច្ចកម្ពុជា ជាពិសេសបង្កើតការងារសម្រាប់ពលរដ្ឋកម្ពុជា រាប់សិបពាន់នាក់បន្ថែមទៀត ខណៈផលិតផលស្បែកជើងនៅក្នុងឆ្នាំ២០១៦ កម្ពុជាសម្រេចបានក្នុងទំហំទឹកប្រាក់ ប្រមាណជាង៧០០លានដុល្លារ៕
