លោកនាយករដ្ឋមន្ត្រី ហ៊ុន សែន លើកឡើងថា រដ្ឋាភិបាលកំពុងតែខិតខំរៀបចំដើម្បីបើកផ្លូវឲ្យពលរដ្ឋខ្មែរទៅធ្វើការនៅក្រៅប្រទេសបន្ថែមទៀត ហើយលោកថា កុំឲ្យចោទករណីនេះជាការបញ្ជូនពលរដ្ឋឲ្យទៅធ្វើ «ខ្ញុំគេ»។
នៅក្នុងពិធីជួបកម្មករ កម្មការិនីនៅតំបន់កំបូលក្នុងរាជធានីភ្នំពេញនៅថ្ងៃនេះ លោកនាយករដ្ឋមន្រ្តី ហ៊ុន សែន បានលើកឡើងថា ប្រទេសផ្សេងៗក៏មានការបញ្ជូនពលរដ្ឋពួកគេទៅធ្វើការនៅក្រៅប្រទេសដែរ រួមទាំងថៃនិង ហ្វីលីពីន។ លោកនាយករដ្ឋមន្ត្រីបន្តថា កុំចាត់ទុកការរកការងារឲ្យពលរដ្ឋធ្វើនៅក្រៅប្រទេសនេះជាការបញ្ជូនឲ្យទៅធ្វើ «ខ្ញុំគេ»។
របាយការណ៍ក្រសួងការងារបង្ហាញថា បច្ចុប្បន្នពលរដ្ឋកម្ពុជាកំពុងធ្វើការនៅក្រៅប្រទេសជាង១លាននាក់ និង បានផ្ញើលុយដែលទទួលបានពីការធ្វើការងារចូលក្នុងប្រទេសវិញរាប់លានដុល្លារក្នុង១ឆ្នាំ។ ចំណែកអ្នកធ្វើការផ្នែកលើកកម្ពស់សិទ្ធិពលករចំណាកស្រុកធ្លាប់ស្នើឲ្យរដ្ឋាភិបាលបង្កើតការងារនៅក្នុងស្រុកសម្រាប់ពលករដែលមិនមានជំនាញ និង មានការអប់រំទាបព្រោះថា អ្នកមិនមានជំនាញទៅធ្វើការងារនៅក្រៅប្រទេសងាយទទួលរងគ្រោះថ្នាក់ និង ការកេងប្រវ័ញ្ចផ្សេងៗ៕