របាយការណ៍អគ្គស្នងការនគរបាលជាតិ បានបង្ហាញថា គ្រោះថ្នាក់ចរាចរណ៍ បានកើតឡើងជាង ២០០លើក នៅក្នុងរយៈពេល ១៧ថ្ងៃ ក្នុងខែធ្នូនេះ ដោយបានកើនឡើង ១៣ភាគរយ បើធៀបទៅនឹងរយៈពេលដូចគ្នាក្នុងខែវិច្ឆិកាកន្លងមក។
របាយការណ៍គ្រោះថ្នាក់ចរាចរណ៍ចេញផ្សាយដោយអគ្គស្នងការនគរបាលជាតិកម្ពុជា នៅព្រឹកថ្ងៃនេះ បានបង្ហាញថា គិតចាប់ពីថ្ងៃទី០១ ដល់ថ្ងៃទី១៧ ខែធ្នូនេះ គ្រោះថ្នាក់ចរាចរណ៍ បានកើតឡើង ២០៤លើកនៅទូទាំងប្រទេស ដោយបានសម្លាប់មនុស្ស ៧៦នាក់ និងបណ្ដាលឲ្យមនុស្សចំនួន ៣៣២នាក់ផ្សេងទៀត រងរបួស។
របាយការណ៍ដដែលនេះបង្ហាញថា ចំនួនគ្រោះថ្នាក់ចរាចរណ៍រយៈពេល ១៧ថ្ងៃកន្លងមកនេះ បានកើនឡើង ១៣ភាគរយ បើធៀបនឹងរយៈពេលដូចគ្នាក្នុងខែវិច្ឆិកាកន្លងមក ដែលមានត្រឹមតែ ១៨១លើកតែប៉ុណ្ណោះ។ ប៉ុន្តែ តួលេខអ្នកស្លាប់ បានថយចុះ ៣ភាគរយ ខណៈចំនួនអ្នករងរបួស បានកើនឡើង ៦ភាគរយ។
ប្រទេសកម្ពុជាទើបតែទទួលបានពានរង្វាន់មួយពីប្រទេសអង់គ្លេស សម្រាប់ជោគជ័យលើការងារកាត់បន្ថយគ្រោះថ្នាក់ចរាចរណ៍ កាលពីពេលថ្មីៗនេះ៕
