ក្រសួងមហាផ្ទៃ បានចេញលិខិតមួយដោយបដិសេធថា លោក ស ខេង មិនបានសន្យាដោះលែងមន្ត្រីការពារសិទ្ធិមនុស្ស ៤ រូប និង មន្ត្រី គ.ជ.ប លោក នី ចរិយា ដូចការអះអាង របស់តំណាងសហគមន៍បឹងកក់នោះទេ ។
កាលពីថ្ងៃទី ១៦ ខែមករា ឆ្នាំ២០១៧ តំណាងសហគមន៍បឹងកក់ អ្នកស្រី ប៊ូវ សោភា លើកឡើងថា ការចាប់មន្ត្រីសិទ្ធិមនុស្ស មន្ត្រី គ.ជ.ប លោក នី ចរិយា និងអ្នកស្រី ទេព វន្នី ធ្វើជាចំណាប់ខ្មាំង ដើម្បីដាក់គំនាបទៅគណបក្សប្រឆាំងនោះ មិនបានចំណេញអ្វីទៅបក្សកាន់អំណាចឡើយ។ អ្នកស្រីអំពាវនាវឲ្យលោក ស ខេង ត្រូវដោះលែងអ្នកជាប់ឃុំចំនួន៥នាក់ដូចអ្វីដែលបានលើកឡើងជាសាធារណៈថា នឹងដោះលែងតាំងពីចុងឆ្នាំ២០១៦។
ប៉ុន្តែនៅថ្ងៃទី ១៨ ខែ មករា ឆ្នាំ ២០១៧ នេះ ក្រសួងមហាផ្ទៃបានចេញលិខិតដោយបដិសេធថា លោក ស ខេង ពុំធ្លាប់បានសន្យាដោះលែងអ្នកដែលកំពុងជាប់ឃុំទាំង ៥ នាក់ នោះទេ «ហើយជាក់ស្ដែងតាមប្រសាសន៍ជាកំណត់ត្រាសំឡេង ដែលនៅជាភស្តុតាង សម្ដេចបានមានប្រសាសន៍ថា៖ ខ្ញុំអត់បានជជែករឿងនេះ ទេគឺឯកឧត្ដម កឹម សុខា ជជែកជាមួយសម្ដេចតេជោ ហើយប្រហែលជាបើតាមខ្ញុំដឹងមុនបំណាច់ខែ ១២ នេះ នឹងមានការដោះស្រាយករណីមន្ត្រីសិទ្ធិមនុស្សនិងអគ្គលេខាធិរង គ.ជ.ប »។
កាលថ្ងៃទី៧ ខែធ្នូ ឆ្នាំ២០១៦ បន្ទាប់ចេញពីកិច្ចប្រជុំបិទទ្វារចំនួនពីរដែលធ្វើឡើងរវាងលោក កឹម សុខា ជាមួយលោក ហ៊ុន សែន និងលោក ស ខេង នៅថ្ងៃនោះ លោក ស ខេង ថ្លែងប្រាប់ក្រុមអ្នកសារព័ត៌មានថា ក្នុងការចរចារវាងលោក កឹម សុខា ជាមួយលោកនាយករដ្ឋមន្ត្រី ហ៊ុន សែន គឺមានពាក់ព័ន្ធនឹងរឿងលោកមេឃុំ ស៊ាង ចែត រួមទាំងមន្ត្រីសិទ្ធិមនុស្សនិងលោក នី ចរិយា ផងដែរ។ បន្ទាប់ពីមានការចរចានោះនៅថ្ងៃទី៨ ខែធ្នូ មេឃុំមកពីគណបក្សប្រឆាំងគឺលោក ស៊ាង ចែត ត្រូវបានដោះលែងឲ្យមានសេរីភាព។