មកទល់ម៉ោងនេះ តារាចម្រៀងចាស់វស្សាគួរសម អ្នកនាងយក់ ឋិតរដ្ឋា កាន់តែបង្ហាញជំហរអស់សង្ឃឹមខ្លាំងឡើងជាមួយផលិតកម្មហង្សមាស បន្ទាប់ពីនាងមិនត្រូវបានផលិតកម្មនេះលើកស្ទួយឲ្យចេញមុខក្នុងកម្មវិធីធំៗ បូករួមទាំកម្មវិធីឆ្លងឆ្នាំនាពេលមុនផង ដែលធ្វើឲ្យនាងអន់ចិត្ត។ ប៉ុន្តែឆ្លើយតបនឹងប្រតិកម្មរបស់តារាស្រីរូបនេះ ថ្នាក់ដឹកនាំហង្សមាសបែរជាប្រកាសសុំមិននិយាយដើម្បីកុំឲ្យរឿងវែងឆ្ងាយទៅវិញ។
អ្នកនាងយក់ ឋិតរដ្ឋា បានប្រកាសជាចំហរថា ខ្លួនតូចចិត្តដែលខាងហង្សមាសមិនផ្ដល់ចម្លើយឲ្យនាង ថាតើនៅត្រូវការនាងក្នុងនាមជាតារាចម្រៀងកុងត្រាបន្តទៀត ឬអស់ចិត្តចង់ប្រើនាងហើយ។ នាងបានបញ្ចេញប្រតិកម្មជាមួយនឹងក្រុមហ៊ុនហង្សមាស ដែលទុកនាងចោល ហើយមិនបញ្ចេញឲ្យនាងឡើងឆាកធំៗ ខណៈដែលតារាចាស់ថ្មីភាគច្រើនត្រូវបានស្ថាប័ននេះលើកឲ្យចេញច្រៀងស្ទើរមិនមានការបាត់មុខ។
អ្នកនាងសរសេរបង្ហោះថា៖ «បើគិតថាខ្ញុំ មិនមានអ្វីសំខាន់សំរាប់អ្នកទៅហើយ! សុំតែអ្នកនិយាយប្រាប់ខ្ញុំតែមួយមាត់បានហើយថាមិនត្រូវការខ្ញុំទៀតទេ សោះនឹងខ្ញុំរង់ចាំលទ្ធផលចុងក្រោយទាំងអស់សង្ឃឹម!»។
សំណេររបស់នាងត្រូវគេឃើញចែកចាយទូលំទូលាយនៅលើបណ្ដាញហ្វេសប៊ុក ដោយមានអ្នកគាំទ្រច្រើននាក់សរសេរបង្ហោះរិះញគន់ថាហង្សមាសចំពោះគោលការណ៍របស់ផលិតកម្មហង្សមាស ដែលទុកនាងចោល ហើយធ្វើឲ្យនាងកាន់តែស្ងាត់ជាមុន ក្រោយពេលចុះកុងត្រាផ្ដាច់មុខ។
បើទោះជាបទរបស់នាងត្រូវបានចេញលក់ជាហូរហែរ ប៉ុន្តែជារឿងកម្រណាស់ដែលតារាស្រីរូបនេះ ត្រូវបានហង្សមាសផ្ដល់ឱកាសឲ្យចេញឡើងឆាកក្នុងព្រឹត្តិការណ៍ធំៗ រហូតបណ្ដាលឲ្យនាងប្រតិកម្ម ហើយមានអ្នកគាំទ្រច្រើនឡើងរិះគន់ប្រតិកម្មដូចគ្នាចំពោះហង្សមាស តែបែរជាមន្ត្រីហង្សមាសមិនមានទស្សនៈណាមួយតបតចំពោះស្ថានភាពដែលបានកើតឡើងលើប្រតិកម្មនេះ។
លោក អ៊ិន ទីតូ អ្នកចាត់ការទូទៅប្រចាំផលិតកម្មហង្សមាសផ្នែកផលិតបទចម្រៀងបានបដិសេធធ្វើការអត្ថាធិប្បាយ ដោយអះអាងថាលោកមិនចង់បញ្ចេញទស្សនៈពាក់ព័ន្ធរឿងនោះ។ លោកថាខ្លួនរវល់មិនចង់បញ្ចេញយោបល់ ហើយលោកក៏មិនទំនេរសម្រាប់ការបកស្រាយពាក់ព័ន្ធនឹងប្រតិកម្មរបស់ យក់ ឋិតរដ្ឋា នោះឡើយ។ យ៉ាងណាមិញ លោកបានប្រកាសថាខ្លួនបានឃើញពាក់ព័ន្ធការបង្ហោះសារ និងការអន់ចិត្តជាសាធារណៈរបស់តារាចម្រៀងរូបនេះ។
មិនខុសគ្នាដែរលោក អ៊ឹង សុខលាភ ជាអគ្គនាយករងទូរទស្សន៍ហង្សមាសបានអះអាងថាលោកមិនអាចផ្ដល់ចម្លើយថាហេតុអ្វីបានជាតារាចម្រៀង យក់ ឋិតរដ្ឋា មិនសូវមានមុខនៅលើកញ្ចក់ទូរទស្សន៍ហង្សមាសក្នុងកម្មវិធីធំៗ របស់ទូរទស្សន៍នោះទេ ដោយលោកបញ្ជាក់ខ្លួនគ្រាន់តែគ្រប់គ្រងទូរទស្សន៍ ប៉ុន្តែពាក់ព័ន្ធនឹងការផលិតកម្មវិធីគឺមានអ្នកផ្សេងទទួលខុសត្រូវ។ លោកថាលោកសុំមិននិយាយជុំវិញប្រតិកម្មរបស់តារាស្រីរូបនេះ ដោយលោកបញ្ជាក់ថារឿងនេះគឺលោកឃើញហើយ តែលោកសុំអត់បញ្ចេញយោបល់។
លោកនិយាយថា៖ «រឿងហ្នឹងខ្ញុំបានឃើញហើយ (ប្រតិកម្មរបស់ យក់ ឋិតរដ្ឋា) តែខ្ញុំអត់អាចនិយាយអីទេ ព្រោះរឿងហ្នឹងខ្ញុំអត់នៅផ្ទាល់ជាមួយគាត់!»។
ជាមួយនឹងការបដិសេធសុំមិនបញ្ចេញយោបល់ លោកក៏បានប្រកាសអត់ដឹងត្រូវនិយាយពីដំណោះស្រាយយ៉ាងណា ដើម្បីឲ្យ យក់ ឋិតរដ្ឋា សប្បាយចិត្តផងដែរ។
លោកនិយាយថា៖ «រឿងហ្នឹងទាល់តែខាងផលិតចម្រៀងបានគេដឹង ខ្ញុំសុំអត់និយាយ»។
យក់ ឋិតរដ្ឋា បានប្រកាសបន្ថែមថាអ្វីដែលនាងប្រកាសឡើងជាគឺជំហរចុងក្រោយរបស់នាងជាមួយហង្សមាស។ នាងថា មិនមានគម្រោងដើរចេញពីផលិតកម្មនោះទេ ប្រសិនបើហង្សមាសមានវិធានការជ្រោមជ្រែងដល់នាងជាថ្មី។ ប៉ុន្តែក្រោយការបដិសេធមិនធ្វើការឆ្លើយតបជាមួយនឹងប្រតិកម្មរបស់នាងបែបនេះ យក់ ឋិតរដ្ឋា នៅត្រឹង និងបានប្រកាសថាចាំមើលស្ថានការណ៍បន្តសិន៕