សាលារាជធានីភ្នំពេញនឹងសាងសង់ផ្លូវថ្មើរជើងស្របតាមមាត់ទន្លេ ចាប់ពីចំណុចស្ពានភ្លោះកោះពេជ្រ រហូតដល់គល់ស្ពានព្រះមុនីវង្សដោយថា ដើម្បីលើកកម្ពស់សោភ័ណភាព និងរៀបចំសណ្ដាប់ធ្នាប់នៅតាមច្រាំងទន្លេឲ្យបានរៀបរយក្លាយទៅជាកន្លែងកំសាន្តរបស់ពលរដ្ឋ។
ក្នុងសេចក្ដីប្រកាសព័ត៌មានចុះថ្ងៃទី១៨ ខែមករា ឆ្នាំ២០១៨ឲ្យដឹងថា នៅថ្ងៃទី២២ ខែមករាខាងមុខនេះ អាជ្ញាធរនឹងចុះសិក្សាវាស់វែងកំណត់ព្រំប្រទល់អចលនវត្ថុ និងរុះរើសចេញនូវចំណែកសំណង់ផ្សេងៗ ដែលលយចូលច្រាំងទន្លេសាធារណៈចាប់ពីស្ពាន ភ្លោះកោះពេជ្រ ដល់ស្ពានព្រះមុនីវង្សក្នុងភូមិសាស្ត្រខណ្ឌចំការមនរាជធានីភ្នំពេញ។
សាលារាជធានីភ្នំពេញស្នើទៅប្រជាពលរដ្ឋ និងអ្នកពាក់ព័ន្ធដែលមានលំនៅដ្ឋាន ឬអាជីវកម្ម កំពុងអាស្រ័យផលនៅទីតាំងខាងលើរៀបចំរុះរើសចេញជាបន្ទាន់នូវចំណែកនៃសំណង់ផ្សេងៗ ដែលបានលយចូលច្រាំងទន្លេសាធារណៈ និងត្រូវតៀមរៀបចំឯកសារផ្សេងៗពាក់ព័ន្ធដើម្បីឲ្យអាជ្ញាធរដោះស្រាយ៕
