គណបក្សប្រជាជនកម្ពុជាធ្វើសន្និបាតរយៈពេល៣ថ្ងៃដែលមានអ្នកចូលរួមជិត៣ពាន់នាក់ដើម្បីពិនិត្យលើការងាររបស់បក្សក្នុងរយៈពេល៥ឆ្នាំកន្លងមកនេះ អនុម័តសេចក្តីព្រាងគោលនយោបាយសម្រាប់អាណត្តិបន្ទាប់ និងបោះឆ្នោតបំពេញបន្ថែមនូវសមាជិកគណៈកម្មាធិការកណ្តាលមួយចំនួនផងដែរ។
ខ្លឹមសារសុន្ទរកថាបានឲ្យដឹងថា សន្និបាតនេះប្រព្រឹត្តិទៅរយៈពេល៣ថ្ងៃគឺចាប់ពីថ្ងៃទី១៩ ដល់ថ្ងៃទី២១ មករា ដែលមានអ្នកចូលរួមពីសមាជិកគណៈកម្មាធិការកណ្តាលចំនួន៤៩៧នាក់ និងសមាជិកបក្សផ្សេងទៀតមានចំនួន២៤០៨នាក់។
ក្នុងសន្ទុកថានោះលើកឡើងថា៖ «បទពិសោធន៍បានបង្ហាញថា ដើម្បីឈានទៅឈ្នះឆ្នោតបាន ត្រូវមានការសន្សំពិន្ទុពីម្ចាស់ឆ្នោតគ្រប់ពេលតាមរយៈគុណភាពការងារ និងអំពើល្អរបស់មន្ត្រីយើង។ ព្រមជាមួយនេះគណបក្សយើងត្រូវមានកម្មវិធីនយោបាយមួយដែលសុក្រឹត្យបំផុត ដើម្បីបង្ហាញម្ចាស់ឆ្នោតឲ្យមានសង្ឃឹមសម្រាប់អនាគត ហើយគាំទ្រគណបក្សយើង»។
រហូតមកដល់ពេលនេះគណបក្សប្រជាជនកម្ពុជាដឹកនាំប្រទេសកម្ពុជាជិត៤០ឆ្នាំមកហើយ ក្រោមការគ្រប់គ្រងរបស់ខ្លួនគណបក្សនេះតែងតែអះអាងថាបានដឹកនាំបានត្រឹមត្រូវ នាំមកនូវសន្តិភាព និងការអភិវឌ្ឍ តែសម្រាប់អន្តរជាតិមើលឃើញថាជាមួយនឹងសន្តិភាព និងការអភិវឌ្ឍទាំងនេះ ក៏មានផងដែរនូវការរំលោភសិទ្ធិមនុស្ស ការគំរាមកំហែង និងការដឹកនាំឈានទៅរករបបផ្តាច់ការ៕