អាជីវករមួយចំនួនលក់ដូរពេលរាត្រីក្នុងរាជធានីភ្នំពេញ នៅម្តុំមាត់ទន្លេ កោះពេជ្រ និងមុខព្រះបរមរាជវាំងជាកន្លែងដែលពលរដ្ឋដើរកំសាន្តនោះ បានត្អូញត្អែរថា ប្រមាណ៤ខែចុងក្រោយនេះការលក់ដូររបស់ពួកគាត់បានធ្លាក់ធ្លាក់ចុះប្រមាណ៥០%។
អ្នកលក់ប្រហិត ពងទាកូន និងខ្ចៅស្ងោរ នៅក្បែរព្រះបរមរាជវំាងជិត២០ឆ្នាំ អ្នកស្រី សួន ណាវី បានរៀបរាប់ការលក់ដូររបស់គាត់បានថយចុះច្រើនរយៈពេល៤ទៅ៥ខែមកនេះ។ អ្នកស្រីថា រូបគាត់មានជីវភាពក្រីក្រមិនមានមុខរបរអ្វីផ្សេងសម្រាប់ចិញ្ចឹមជីវិតទេ។
អាជីវករលក់សំលៀកបំពាក់ និងស្បែកជើង នៅកោះពេជ្យ លោក អ៊ុំ សម្បត្តិ បានឲ្យដឹងដែរថា កាលពីមុនគាត់លក់ចាប់ពីម៉ោង៥ល្ងាចដល់ម៉ោង១១យប់ រកចំណូលបានប្រហែល២០០ដុល្លារលក់ក្នុង១ពេល។ ប៉ុន្តែលោកថា នៅដើមឆ្នាំ២០១៨នេះលក់បានប្រហែលជា៥០ដុល្លារក្នុង១ពេល ដោយថាករណីនេះ បង់ថ្លៃតូប ទឹក និងភ្លើងជាដើម មិនចំណេញនោះទេ។
អ្នកស្រីនិយាយថា «ពីមុនអាចលក់បាន១០០ ឬ២០០ដុល្លារដែរ ឥឡូវសល់ត្រឹម៥០ដុល្លារ ពិបាកដែររាល់ថ្ងៃ មិនដឹងរកអ្វី[មុខរបរអ្វី] ចេះតែទ្រាំៗទៅ»។
អាជីវករលក់ភេសជ្ជៈគ្រប់មុខ នៅមុខវត្តបុទុមវត្តី អ្នកស្រី ម៉ាក់ លីហ្សា គត់សម្គាល់ថា ចំនួនអ្នកដើរលំហែកាយនៅតាមសួនសាធារណៈទាំងនេះហាក់ថយចុះជាងមុន នាំឲ្យរូបគាត់និង អ្នកលក់ដូរនៅក្បែរៗនោះលក់មិនសូវដាច់។ ពេលនិយាយដល់ការលក់មិនសូវដាច់ អ្នកស្រីនឹកបារម្ភពីជីវភាព។
អ្នកស្រីនិយាយថា «ការចិញ្ចឹមកូនចៅ លក់អត់ដាច់ ប៉ះពាល់ដែរ ប៉ះពាល់តំាងពីកូនរៀន ការជួលផ្ទះ…និយាយឲ្យចំការរកស៊ីមុខរបរប៉ុណ្នឹង ខ្ចីលុយគេថែម ដ៏ចឹងប៉ះពាល់សេដ្ឋកិច្ចគ្រួសារយើង។
ប្រជាពលរដ្ឋដែលដើរកំសាន្តនៅតាមមាត់ទន្លេ អ្នកស្រី លីម ខាន់ បានឲ្យដឹងថា បច្ចុប្បន្ននេះ គាត់មិនសូវចាយលុយច្រើនដូចកាលពីឆ្នាំកន្លងទៅនោះទេ ដោយថាបារម្ភពីការធ្លាក់ចុះសេដ្ឋកិច្ចនៅកម្ពុជា។
អ្នកស្រីនិយាយថា «ខ្ញុំឭចាស់ៗគាត់ចេះតែប្រាប់ខ្ញុំថា តិចទៀតបោះឆ្នោតម៉េចម៉ាទៅ ចេះទុកលុយនៅនឹងខ្លួនទៅ ត្រៀមដ៏ពេលយើងម៉េចទៅ យើងទៅផ្ទះ ទៅស្រុក ចឹងទៅចាយត្បិតត្បៀត»។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា សន ជ័យ យល់ថា ស្ថានការនយោបាយបច្ចុប្បន្ននេះ ធ្វើឲ្យប៉ះពាល់អារម្មណ៍ប្រជាពលរដ្ឋខ្លំាង ជាពិសេសអ្នកធ្វើអាជីវកម្មនិងអ្នកជំនួញធំៗ។ ប៉ុន្តែលោកថា ជំរើសល្អ រដ្ឋាភិបាលត្រូវរកដំណោះស្រាយនយោបាយមួយប្រកបដោយការទុកចិត្ត ទំាងអ្នកវិនិយោគបរទេស និងប្រជាពលរដ្ឋខ្មែរ ទើបទទួលបានផលវិជ្ជមាន។
លោកយល់ថា «ការដោះស្រាយបញ្ហានយោបាយ ហើយនិងការធ្វើឲ្យប្រសើរឡើងនូវ សុខដុមរម្យនាផ្នែកនយោបាយក្នុងប្រទេសមួយ ទាក់ទាញវិនិយោគបរទេស ទំាងអស់នេះ វានាំមកនូវការជឿទុកចិត្តកាន់តែខ្លំាង ឬក៏អាចទាក់ទាញក្នុងការជឿទុកចិត្តពីប្រជាពលរដ្ឋបាន»។
សរុបមកវិញ អ្នកលក់ដូរមួយចំនួននៅតាមមុខវំាង មុខវត្តបុទុមវត្តី មាត់ទន្លេសាប ផ្សាររាត្រី និងកោះពេជ្យ ជាដើម បានអះអាងប្រហាក់ប្រហែលគ្នាថា ពួកគេនៅតែបារម្ភពីការលក់ដូរមិនសូវដាច់ និងធ្វើឲ្យសេដ្ឋកិច្ចកម្ពុជាធ្លាក់ចុះ ដោយថាពួកគេ ធ្លាប់ស្តាប់វិទ្យុ និងសារព័ត៌មានផ្សាយថា សហគមន៍អន្តរជាតិលោកសេរីបានដាក់សម្ពាធផ្នែកសេដ្ឋកិច្ចលើកម្ពុជា បន្ទាប់ពីរំលាយគណបក្សសង្គ្រោះជាតិ៕