ប្រធានាធិបតី បារ៉ាក់ អូបាម៉ា នឹងធ្វើទស្សនកិច្ចទៅកាន់ប្រទេសគុយបានៅដើមខែក្រោយនេះដែលជាលើកដំបូងរបស់មេដឹកនាំអាមេរិកទៅកាន់ប្រទេសអតីតសត្រូវនៃសង្គ្រាមត្រជាក់ចាប់តាំងពីឆ្នាំ១៩២៨។
តាមការចុះផ្សាយរបស់បណ្ដាញផ្សាយព័ត៌មាន BBC លោក អូបាម៉ា ដែលទៅកាន់ប្រទេសគុយបាជាលើកដំបូងនេះត្រូវជួបប្រធានាធិបតី រ៉ាអ៊ូ ក្រាស្ត្រូ ហើយនិងអ្នកនយោបាយប្រឆាំងមួយចំនួន។
បេក្ខជនមកពីគណបក្សសាធារណៈរដ្ឋលោក Marco Rubio និងលោក Ted Cruz ដែលពួកគាត់ជាកូនអន្ដោប្រវេសន៍ជាតិគុយបាបានហៅដំណើរទស្សនកិច្ចរបស់លោក អូបាម៉ា នៅពេលនេះថាជាកំហុសប្រវត្តិសាស្ដ្រ។
ទីក្រុងវ៉ាស៊ីនតោននិងទីក្រុងហាវ៉ាន់ណាបានស្ថាបនាទំនាក់ទំនងការទូតជាមួយគ្នាឡើងវិញកាលពីខែកក្កដាឆ្នាំ២០១៥ហើយពេលនោះសហរដ្ឋអាមេរិកបានបន្ធូរបន្ថយការហ៊ុំព័ន្ធសេដ្ឋកិច្ចដែលបានដាក់ចុះកាលពី៥៤ឆ្នាំមុន៕
ប្រភព: BBC