ក្រសួងការបរទេសកម្ពុជាឲ្យដឹងថាពលករខ្មែរម្នាក់ដែលបម្រើការងារនៅក្នុងប្រទេសអារ៉ាប៊ី សាអូឌីត ត្រូវបានរដ្ឋាភិបាលជួយនិងបញ្ជូនឲ្យត្រឡប់មកកម្ពុជាវិញ ដោយក្រសួងអះអាងថាស្រ្តីម្នាក់នោះមិនអាចធន់នឹងអាកាសធាតុ។
នៅក្នុងសេចក្តីប្រកាសព័ត៌មានចេញផ្សាយនៅថ្ងៃសុក្រនេះ ក្រសួងការបរទេសបញ្ជាក់ថាស្រ្តីខ្មែរអ៊ីស្លាមម្នាក់ ឈ្មោះ ហ៊ីម ស្រី ដែលជាអ្នកបម្រើតាមផ្ទះនៅប្រទេសអារ៉ាប៊ី សាអូឌីត កំពុងជួបការលំបាកក្នុងការងារ ដោយមានសុខភាពខ្សោយនិងមិនអាចប្រឈមជាមួយអាកាសធាតុត្រជាក់នៅប្រទេសនោះ។ ក្រសួងបន្តថាក្រសួងបានអន្តរាគមន៍ករណីនេះនិងជួយឲ្យស្រ្តីរូបនោះអាចវិលត្រឡប់មកមាតុប្រទេសវិញតាមបំណងប្រាថ្នា។
ក្រសួងបញ្ជាក់ថា៖ “ក្រោយពីមានការអន្តរាគមន៍យ៉ាងស្វិតស្វាញរបស់ស្ថានទូត ក្រុមហ៊ុននាំពលករនិងម្ចាស់ផ្ទះ បានយល់ព្រមរៀបចំឲ្យស្ត្រីឈ្មោះ ហ៊ីម ស្រី វិលត្រឡប់មកកម្ពុជាវិញ ដោយផ្តល់សំបុត្រយន្តហោះពីទីក្រុងរីយ៉ាត មកទីក្រុងបាងកក ហើយក្រុមហ៊ុនមកទទួលបន្តនៅបាងកក ធ្វើដំណើរមកកម្ពុជា តាមច្រកអន្តរជាតិប៉ោយប៉ែត”។ បើតាមក្រសួង ពលករម្នាក់នោះនឹងមកដល់បាងកក នៅថ្ងៃទី២០ ខែកុម្ភៈ ឆ្នាំ២០១៦ វេលាម៉ោង១១:៣៥នាទី។
គួរបញ្ជាក់ថាកាលពីថ្ងៃទី១១ខែកុម្ភៈ រដ្ឋាភិបាលកម្ពុជានិងអារ៉ាប៊ីសាអូឌីតបានចុះហត្ថលេខាលើកិច្ចព្រមព្រៀងក្នុងការជ្រើសរើសពលករការងារផ្ទះនិងជ្រើសរសើពលករការងារទូទៅ។ រដ្ឋាភិបាលកម្ពុជាបានបញ្ជាក់ថា៖ “កិច្ចព្រមព្រៀងទាំងនេះគឺជាឧបករណ៍ដ៏សំខាន់ក្នុងការការពារសិទ្ធិនិងផលប្រយោជន៍ពលករខ្មែរដោយភាគីទាំងពីរត្រូវរៀបចំឲ្យមានប្រព័ន្ធគ្រប់គ្រងការជ្រើសរើស ការដាក់ឲ្យធ្វើការ និងការធ្វើមាតុភូមិនិវត្តន៍របស់ពលករដោយអនុលោមទៅតាមច្បាប់និងបទដ្ឋានការងារសមរម្យនិងបទដ្ឋានសុវត្ថិភាពការងារ”។
ក្រោមកិច្ចព្រមព្រៀងនេះ កម្ពុជានឹងផ្គត់ផ្គង់ពលករក្នុងស្រុកដែលមានលក្ខណៈសម្បត្តិនិងសមត្ថភាពក្នុងកិច្ចការផ្ទះ៕