តម្រួតថៃបានចាប់ផ្ដើមបើកការស៊ើបអង្កេតទៅលើមន្ត្រីតម្រួត ៦០នាក់នៅតាមស្ថានីយ៍តម្រួត ៤កន្លែងនៅទីក្រុងបាងកក ដោយសង្ស័យថា ពួកគេបានទទួលអាំងប៉ាវពីម្ចាស់បនល្បែង។ នេះបើតាមការចុះផ្សាយរបស់សារព័ត៌មានសិង្ហបុរី Channel News Asia។
ការទទួលយកកញ្ចប់អាំងប៉ាវក្រហមផ្ទុកទៅដោយលុយ ត្រូវបានគេចែកចាយនៅអំឡុងពិធីបុណ្យចូលឆ្នាំថ្មីប្រពៃណីចិន។
មេបញ្ជាការតម្រួតតំបន់ ៧នៅទីក្រុងបាងកក លោកឧត្ដមសេនីយ៍ទោ ប៊ូនយ៉ាឫទ្ធិ រដ្ឋម៉ា បានបញ្ជាឲ្យបើកការស៊ើបអង្កេតនេះ បន្ទាប់ពីវីដេអូឃ្លីបមួយដែលបានបង្ហាញក្រុមតម្រួតថៃឈររង់ចាំជាជួរដើម្បីទទួលអាំងប៉ាវពីម្ចាស់បនល្បែងនោះ បានលេចឡើងនៅលើបណ្ដាញសង្គមរបស់ប្រទេសថៃ។
យោងតាមសារព័ត៌មានក្នុងស្រុក វីដេអូឃ្លីបនោះ ត្រូវបានអ្នកប្រើប្រាស់បណ្ដាញសង្គមចូលទៅទស្សនា ១៥៩ពាន់ដង និងចែករំលែកបន្តជាង ២ ២០០ដង នៅក្នុងរយៈពេលត្រឹមតែ ១៥ម៉ោង ចាប់តាំងពីវាត្រូវបានបង្ហោះនៅបណ្ដាញសង្គមហ្វេសប៊ុកកាលពីថ្ងៃសុក្រសប្ដាហ៍មុន។
លោក ប៊ូនយ៉ាឫទ្ធិ បាននិយាយថា លោកបានបញ្ជាឲ្យស៊ើបអង្កេត និងសួរចម្លើយតម្រួតមកពីតំបន់តាលីងច័ន្ទ តំបន់ធម្មសាលា តំបន់បាងយីខាន និងតំបន់បាងសៅថង មេតម្រួតនៅតាមស្ថានីយ៍តម្រួតនីមួយៗ និងមេតម្រួតនៅតាមស្ថានីយ៍នីមួយៗផងដែរ។
លោកបញ្ជាក់ថា ស្ថានីយ៍តម្រួតទាំង ៤កន្លែងខាងលើ ត្រូវបានបញ្ជាឲ្យសរសេររបាយការណ៍បង្ហាញទៅការិយាល័យតម្រួតទីក្រុងបាងកកនៅក្នុងរយៈពេល ១សប្ដាហ៍។
បញ្ហានេះបានកើតឡើងតែមួយសប្ដាហ៍ប៉ុណ្ណោះបន្ទាប់ពីស្នងការរងតម្រួតថៃ លោកឧត្ដមសេនីយ៍ ចាឡឺមកៀត ស៊ីវរៈខាន់ បានចេញបញ្ជាទៅមេស្ថានីយ៍តម្រួតទាំងអស់ ឲ្យធានាថា មន្ត្រីក្រោមឱវាទរបស់ពួកគេ មិនទទួលយកអាំវប៉ាវពីក្រុមឈ្មួញជាប់ខ្សែស្រឡាយចិននោះឡើយ៕
