មេធាវីការពារក្តីឲ្យមេដឹកនាំអតីតបក្សប្រឆាំង បានអះអាងថា កូនក្ដីលោកនឹងបង្ហាញខ្លួននៅក្នុងសវនាការ ប្រសិនបើតុលាការជាន់ខ្ពស់នាំខ្លួនកូនក្ដីរបស់លោកចូលសវនាការនៅសប្ដាហ៍ក្រោយនេះ ដូចទៅនឹងសេចក្ដីរាយការណ៍ថ្មីៗនេះ។
ដោយអះអាងថា បានដកស្រង់ខ្លឹមសារនៃលិខិតបង្គាប់ឲ្យនាំខ្លួនរបស់សាលឧទ្ធរណ៍នោះ សារព័ត៌មានស្និទ្ធនឹងរដ្ឋាភិបាល Fresh News បានផ្សាយកាលពីថ្ងៃម្សិលមិញថា លោក កឹម សុខា នឹងត្រូវបាននាំខ្លួនចូលសវនាការបណ្ដឹងសុំនៅក្រៅឃុំ ដែលនឹងធ្វើឡើងនៅសាលាឧទ្ធរណ៍នៅថ្ងៃទី២៧ ខែមីនានេះ។
វីអូឌីមិនអាចស្វែងរកការបញ្ជាក់អ្នកនាំពាក្យសាលាឧទ្ធរណ៍ លោក ទូច ថារិទ្ធ បានទេនៅព្រឹកថ្ងៃនេះ។
ចំណែកឯលោក សំ សុគង់ មេធាវីការពារក្ដីឲ្យលោក កឹម សុខា បានប្រាប់VODនៅថ្ងៃនេះថា លោកពុំទាន់ទទួលបានលិខិតបង្គាប់នោះនៅឡើយទេ។
ថ្វីបើបែបនេះក្ដី មេធាវីរូបនេះចង់ឃើញកូនក្ដីរបស់លោកមានវត្តមាននៅក្នុងសវនាការនាសប្ដាហ៍ក្រោយនេះ ដោយថា ដើម្បីឲ្យកូនក្ដីលោកងាយស្រួលបង្ហាញភាពស្អាតស្អំនៅចំពោះមុខអង្គជំនុំជម្រះ។
លោក សំ សុគង់ ប្រាប់ថា៖ «ការស្នើសុំនៅក្រៅឃុំបណ្តោះអាសន្នដោយសារតែយើងមានភស្តុតាងគ្រប់គ្រាន់ គឺមិនមានការបារម្ភអីទេ។ ការនៅក្រៅឃុំ វាអត់ប៉ះពាល់ដល់នីតិវិធីនៃការស៊ើបសួររបស់តុលាការ ហើយកូនក្តីខ្ញុំក៏បានសន្យាបង្ហាញខ្លួននៅគ្រប់នីតិវិធីរបស់តុលាការ បើតុលាការកោះហៅ ហើយទីពីរក្រុមមេធាវីក៏បានដាក់ពាក្យទៅតុលាការសុំឲ្យលោក កឹម សុខា បានទៅព្យាបាលសុខភាពនៅប្រទេសសាំងហ្កាពួរផងដែរ»។
លោក កឹម សុខា កំពុងស្ថិតនៅក្រោមការឃុំខ្លួនអស់រយៈពេលជាង ៦ខែមកហើយ ចាប់តាំងពីលោកត្រូវបានសមត្ថកិច្ចចាប់ខ្លួនកាលពីដើមខែកញ្ញាឆ្នាំមុន ក្រោមការចោទប្រកាន់ពីរដ្ឋាភិបាលថា «ក្បត់ជាតិ» និង «ឃុបឃិត» ជាមួយបរទេស ប៉ុនប៉ងផ្ដួលរំលំរដ្ឋាភិបាលស្របច្បាប់ ប៉ុន្តែ គណបក្សប្រឆាំងតែងតែច្រានចោលការចោទប្រកាន់នេះ៕