គណៈកម្មការអន្តរក្រសួង ទទួលបន្ទុកទប់ស្កាត់និងបង្រ្កាបបទល្មើសនេសាទនៅបឹងទន្លេសាប អះអាងថា ពួកគេនឹងស្នើធ្វើវិសោធនកម្មលើមាត្រាមួយចំនួននៃច្បាប់ស្តីពីជលផល ឲ្យមានលក្ខខណៈតឹងរ៉ឹងជាងមុន ខណៈច្បាប់ចាស់នាពេលបច្ចុប្បន្ន ហាក់មិនសូវមានប្រសិទ្ធិភាពនៅឡើយ។
ថ្លែងប្រាប់ក្រុមអ្នកសារព័ត៌មាន បន្ទាប់ពីកិច្ចប្រជុំបូកសរុបលទ្ធផលការងារបង្ក្រាបបទល្មើសនេសាទ នៅព្រឹកថ្ងៃពុធទី១៩មេសានេះ នៅឯក្រសួងមហាផ្ទៃ ប្រធានគណៈកម្មការអន្តរក្រសួងទប់ស្កាត់បទល្មើសនេសាទនៅបឹងទន្លេសាប និងជារដ្ឋមន្ត្រីក្រសួងកសិកម្ម លោក វេង សាខុន ឲ្យដឹងថា នៅសប្តាហ៍ក្រោយគណៈកម្មាការនឹងបើកការប្រជុំមួយ ដើម្បីពិភាក្សាលើការធ្វើវិសោធនកម្មលើមាត្រាចំនួន៣ នៃច្បាប់ស្តីពីជលផល ដោយថា ដើម្បីពង្រឹងការត្រួតពិនិត្យ និងការប្រើប្រាស់ឧបករណ៍នេសាទឲ្យបានត្រឹមត្រូវ និងទុកផ្ទៃទឹកខ្លះ ដើម្បីឲ្យត្រីរស់នៅ ខណៈច្បាប់បច្ចុប្បន្នហាក់មានភាពយោគយល់ច្រើន ហើយមិនមានអ្នកគោរពតាម។
បើតាមលោក វេង សាខុន វិសោធនកម្មមាត្រាថ្មីនេះ គឺសម្រេចបង្រួមប្រវែងនៃការរាយ ណ ឬរ៉ាវ ដែលជាឧបករណ៍នេសាទត្រី ដែលពីមុនលោកថា អាចអនុញ្ញាតបានទៅដល់៥០០ម៉ែត្រ មកនៅត្រឹមមិនលើសពី២០០ម៉ែត្រវិញ។
លោកថា៖ «ច្បាប់ហ្នឹងយើងបង្កើតឡើងនៅឆ្នាំ២០០៥ ២០០៦ កាលនោះ យើងមើលទៅប្រជានេសាទគឺតិចអញ្ចឹងយើងបើកឲ្យពួកគាតនេសាទដល់ទៅ៥០០ម៉ែត្រ អាចធ្វើរបាំងនរ៉ាវហ្នឹង ដល់អញ្ចឹងទៅប្រសិនជាយើងបណ្តែតបណ្តោយដល់ថ្នាក់ហ្នឹងផ្ទៃទឹកយើងគឺអស់ហើយ […] ច្បាប់បានចែងថា នៅពេលដែលដល់រដូវបិទនេសាទគឺអនុញ្ញាត្តិឲ្យប្រជាជនដាក់របាំងនរ៉ាវហ្នឹង គឺប្រវែងតិចជាង៥០ម៉ែត្រ ដែលមានក្រឡាហ្នឹងធំជាង៤សង់ទីម៉ែត្រ នៅពេលរដូវបើកនេសាទគឺអនុញ្ញាត្តឲ្យប្រជាជនដាក់នរ៉ាវ […]»។
លោកបានបន្ថែមថា តាមរយៈយុទ្ធនាការចុះអង្កេតរបស់គណៈកម្មការកាលពីកន្លងទៅ ខេត្តដែលនៅសេសសល់បញ្ហាបទល្មើសនេសាទច្រើនជាងគេ គឺខេត្តកំពង់ធំ។
ប្រធានសម្ព័ន្ធប្រជានេសាទកម្ពុជា លោក ឡុង សូចែត បានសារទរចំពោះការធ្វើការវិសោធនកម្មនេះ ដោយថា វិសោធនកម្មនេះ វាបានកំណត់ទទួលស្គាល់ការនេសាទដោយប្រើ ណ ឬរ៉ាវនេះ។
ទោះជាយ៉ាងណា លោកបន្តព្រួយបារម្ភ ពីប្រសិទ្ធភាពនៃការអនុវត្តច្បាប់វិញ ជាងការធ្វើវិសោធកម្ម ព្រោះលោកថា បទល្មើស ដែលបន្តកើតមានរាល់ថ្ងៃនេះ បណ្តាលមកពីភាពធូររលុងរបស់មន្ត្រីអនុវត្តច្បាប់ ដែលធ្វើឲ្យអ្នកល្មើសគឺនៅតែល្មើសដដែល។
លោកថា៖ «បើនិយាយពីបណរ៉ាវ វាមិនមែនជាឧបករណ៍ស្របច្បាប់ទេវាជាឧបករណ៍ខុសច្បាប់ណា ប៉ុន្តែប្រសិនដាក់កំណត់វាថា បណរ៉ាវ កំណត់ត្រឹម១០០ម៉ែត្រ ឬ២០០ម៉ែត្រ អាហ្នឹងវាជាការល្អមួយដែរព្រោះកន្លងមកយើងទប់ស្កាត់ការដាក់បរ ណរ៉ាវ ហ្នឹងអត់បានទេ មានគ្រប់កន្លែងវាដូចជាប្រពៃណី របស់អ្នកទន្លេសាបណា មានអ្នកតដាក់ទ្រង់ទ្រាយតូច ក៏ប៉ុន្តែប្រសិនជាច្បាប់កំណត់ដាក់២០០ម៉ែត្រយើងដាក់កំណត់ឲ្យបានទូទៅកំរិតឲ្យបាននោះ វាល្អជាងអត់មានច្បាប់»។
របាយការណ៍របស់គណកម្មការទប់ស្កាត់ និងបង្រ្កាបបទល្មើសនេសាទនៅបឹងទន្លេសាប បានឲ្យដឹងថាក្នុងរយៈពេល៤ខែ ចាប់ពីខែធ្នូឆ្នាំ២០១៦ មកដល់ខែមេសាឆ្នាំ២០១៧នេះ គណកម្មការនេះបានបង្ក្រាបបទល្មើសនេសាទសរុបមាន៧០៦ករណី ដែលក្នុងនោះមនុស្សចំនួន៣៦នាក់ត្រូវបានបញ្ជូនទៅតុលាការ៕