មេបញ្ជាការកងទ័ពអាមេរិកបានបញ្ជាក់ថា នាវាដឹកយន្តហោះចម្បាំង ដែលបានធ្វើដំណើរទៅកាន់ឧបទ្វីបកូរ៉េហើយបានបង្កឲ្យភាពតានតឹងផ្ទុះឡើងនោះ គឺមិនមែនចល័តទៅទីនោះដើម្បីទប់ទល់ជាមួយកូរ៉េខាងជើងនោះទេ ហើយថា នឹងធ្វើដំណើរបន្តទៀតចេញពីទីនោះ។
កាលពីថ្ងៃទី៨ខែមេសា នាវាចម្បាំងរបស់អាមេរិកមួយក្រុមដែលដឹកនាំដោយក្រុម USS Carl Vinson ធ្វើដំណើរឆ្ពោះទៅជិតកូរ៉េខាងជើង នាំឲ្យមានភាពតានតឹងកាន់តែខ្លាំងនៅក្នុងឧបទ្វីបនេះ។
មេបញ្ជាការមន្ទីរប៉ង់តាហ្គោនជាទីបញ្ជាការកងទ័ពអាមេរិកលោក Jim Mattis ថ្លែងកាលពីថ្ងៃទី១១ខែមេសាថា Vinson ត្រូវធ្វើដំណើរឆ្លងកាត់ឧបទ្វីបនោះ ហើយមួយថ្ងៃក្រោយមកប្រធានាធិបតីអាមេរិកលោកត្រាំបញ្ជាក់ថា អាមេរិកបញ្ជូនបន្ថែមកម្លាំងខ្លាំងៗរបស់ខ្លួនទៅឧបទ្វីបកូរ៉េបន្ថែមទៀត។
ប៉ុន្តែនៅថ្ងៃអង្គារម្សិលមិញ មន្ត្រីការពារជាតិរបស់អាមេរិកថ្លែងAFPថា នាវាចម្បាំងនោះនឹងធ្វើដំណើរចាកចេញពីឧបទ្វីបកូរ៉េ បន្តទៅកាន់ឆ្នេរសមុទ្រអូស្ត្រាលីតាមការគ្រោងទុក៕