មន្ដ្រីជាន់ខ្ពស់រដ្ឋាភិបាលចិន បានប្រកាសបើកភ្លើងខៀវឲ្យរដ្ឋាភិបាលកម្ពុជា ចាត់វិធានការផ្លូវច្បាប់លើក្រុមអ្នកវិនិយោគ និងជនជាតិចិន ដែលបានប្រព្រឹត្តខុសច្បាប់ និងទំនៀមទម្លាប់ខ្មែរនៅលើទឹកដីកម្ពុជា។ នេះបើតាមការចុះផ្សាយរបស់គេហទំព័រនគរបាលជាតិ។
គេហទំព័រនគរបាលជាតិបានចុះផ្សាយបែបនេះ ដោយបានដកស្រង់សម្ដីអគ្គនាយកនៃអគ្គនាយកដ្ឋានកិច្ចសហប្រតិបត្តិការអន្តរជាតិរបស់ក្រសួងសន្តិសុខសាធារណៈចិន លោក លាង ជីងរ៉ុង អំឡុងជំនួបជាមួយអគ្គស្នងការនគរបាលជាតិកម្ពុជា លោក នេត សារឿន នៅថ្ងៃនេះ។
ប៉ុន្ដែ បើតាមគេហទំព័រនគរបាលជាតិដដែល ក្នុងជំនួបនោះ លោក លាង ជីងរ៉ុង ក៏បានស្នើទៅរដ្ឋាភិបាលកម្ពុជា ឲ្យជួយបង្កើនកិច្ចការពារសុវត្ថិភាព និងសន្ដិសុខដល់ក្រុមអ្នកវិនិយោគ និងជនជាតិខ្លួន ដែលកំពុងរស់នៅកម្ពុជាផងដែរ ដោយលោករំឭកថា កំណើនជនជាតិចិន ក៏ជួយដល់ការអភិវឌ្ឍសេដ្ឋកិច្ចរបស់កម្ពុជាផងដែរ។
បើតាមរបាយការណ៍ក្រសួងទេសចរណ៍ ភ្ញៀវទេសចរដល់ទៅជាង ១លាន ២សែននាក់ បានចូលមកប្រទេសកម្ពុជា ដែលធ្វើឲ្យជនជាតិចិនឈានមុខគេនៅលើកំពូលតារាងនៃភ្ញៀវទេសចរបរទេសសរុប ៥លាន ៦សែននាក់ ដែលចូលមកប្រទេសកម្ពុជាកាលពីឆ្នាំកន្លងមកនេះ។
ទោះជាយ៉ាងណា ជនជាតិចិនដល់ទៅ ៤០៧នាក់ ត្រូវបានសមត្ថកិច្ចកម្ពុជាចាប់ខ្លួននៅរាជធានីភ្នំពេញ ខេត្តសៀមរាប និងខេត្តព្រះសីហនុ កាលពីឆ្នាំ២០១៧កន្លងមកនេះ ជុំវិញឧក្រិដ្ឋកម្មតាមប្រព័ន្ធបច្ចេកវិទ្យាទូរគមនាគមន៍ ដើម្បីឆបោក និងចាប់ជំរិតជនជាតិចិននៅឯប្រទេសចិន៕