ប្រធានាធិបតីសហរដ្ឋអាមេរិកថ្លែងបញ្ជាក់ជំហរថា បើសិនជាគម្រោងដែលលោកនឹងជួបចរចាជាមួយមេដឹកនាំកូរ៉េខាងជើងលោក គីម ជុងអ៊ុន មិនទទួលបានផលផ្លែផ្កានោះ លោកនឹងដកខ្លួនចេញពីការចរចា។
នៅក្នុងសន្និសីទរួមគ្នាជាមួយនាយករដ្ឋមន្ត្រីជប៉ុន លោក ហ្ស៊ីនហ្សូ អាបេ លោក ត្រាំថ្លែងថា ការដាក់សម្ពាធខ្ពស់បំផុត ដើម្បីរំលាយកម្មវិធីអាវុធនុយក្លេអ៊ែរបស់កូរ៉េខាងជើងនៅតែបន្តរក្សាដដែល។ នេះបើតាមសារព័ត៌មានBBC។
លោក អាបេ បានទៅបំពេញទស្សនកិច្ចនៅសហរដ្ឋអាមេរិក ហើយបានជួបជាមួយលោក ដូណល ត្រាំ នៅកន្លែងសម្រាកលំហែកាយរបស់លោកត្រាំ នៅ ហ្វ័ររីដា។
កាលពីព្រឹកម្សិលមិញលោក ដូណល ត្រាំ ថ្លែងបញ្ជាក់ថា នាយកCIA លោក Mike Pompeo បានធ្វើដំណើរដោយសម្ងាត់មួយទៅកូរ៉េខាងជើង ដើម្បីជួបជាមួយលោកគីម ជុងអ៊ុន។
លោក ត្រាំ ថ្លែងថា ប្រធានCIA រូបនោះមានទំនាក់ទំនងល្អជាមួយកូរ៉េខាងជើង ហើយក្នុងជំនួបជាមួយលោកគីម ក៏បានផលល្អដែរ។
លោក ត្រាំគ្រោងនឹងជួបជាមួយលោក គីម ជុងអ៊ុននៅក្នុងខែឧសភា ខាងមុខនេះ ដើម្បីពិភាក្សាពីការរក្សាសន្តិសភាពនៅក្នុងតំបន់ដោយលុបបំបាត់អាវុធនុយក្លេអ៊ែនៅឧបទ្វីបកូរ៉េ។