រដ្ឋាភិបាលស៊ីវិលរបស់លោកស្រី អ៊ុង សានស៊ូជី កាលពីថ្ងៃពុធម្សិលមិញបានស្វាគមន៍ចំពោះសេចក្ដីសម្រេចរបស់សហរដ្ឋអាមេរិកក្នុងការទម្លាក់ចោលទណ្ឌកម្មសេដ្ឋកិច្ចទៅលើប្រទេសភូមា ហើយចាត់ទុកសេចក្ដីសម្រេចចិត្តនេះអាចបើកផ្លូវសម្រាប់ការវិនិយោគ ខណៈប្រទេសនេះកំពុងព្យាយាមចាកចេញពីភាពក្រីក្រ។
គណបក្សលោកស្រី ស៊ូជី បានចូលកាន់អំណាចកាលពីខែមីនាកន្លងមក បន្ទាប់ពីទទួលជោគជ័យយ៉ាងធំក្នុងការបោះឆ្នោតកាលពីឆ្នាំមុន ដែលជាការបោះឆ្នោតដ៏សេរីបំផុតសម្រាប់ប្រទេសមួយដែលធ្លាប់ស្ថិតក្រោមការគ្រប់គ្រងរបស់ពួកយោធាអស់កន្លះសតវត្សរ៍។
រដ្ឋាភិបាលថ្មីរបស់ប្រទេសនេះកំពុងប្រឈមនឹងកិច្ចការដ៏ធ្ងន់ធ្ងរ ដើម្បីស្ដារប្រទេសក្នុងតំបន់អាស៊ានមួយនេះ ដែលមានបញ្ហាផ្នែកហេដ្ឋារចនាសម្ព័ន្ធ ជម្លោះនៅតាមព្រំដែន និងឥទ្ធិពលរបស់ពួកយោធា ដែលនៅតែគ្របដណ្ដប់លើប្រទេសនេះនៅឡើយ។
សហរដ្ឋអាមេរិក កាលថ្ងៃពុធម្សិលមិញបានលើកលែងនូវទណ្ឌកម្មសេដ្ឋកិច្ចនិងការហ៊ុមព័ទ្ធពាណិជ្ជកម្ម ដោយសារប្រទេសនេះ បានផ្ទេរអំណាចពីរដ្ឋាភិបាលយោធាទៅរដ្ឋាភិបាលស៊ីវិលមួយកាលពីខែមីនាកន្លងមក។
ក្រុងវ៉ាស៊ីនតោនបានដកចេញទណ្ឌកម្មជាច្រើន ដើម្បីជាការលើកទឹកចិត្តចំពោះកំណែទម្រង់នេះចាប់តាំងពីការបញ្ចប់របបគ្រប់គ្រងយោធានៅឆ្នាំ២០១១ ប៉ុន្តែនៅរក្សាទុកទណ្ឌកម្មជាច្រើនទៀត ដើម្បីជំរុញឲ្យមានការផ្លាស់ប្ដូរបន្ថែមនិងការគោរពសិទ្ធិមនុស្ស៕