ក្រសួងការបរទេសចិន បានប្រកាសថា ប្រទេសចិន និងបណ្ដាប្រទេសនៅអាស៊ីអាគ្នេយ៍ កាលពីថ្ងៃម្សិលមិញនេះ បានឯកភាពគ្នាទៅលើសេចក្ដីព្រាងគោលការណ៍មួយ សម្រាប់ក្រមប្រតិបត្តិតំបន់សមុទ្រចិនខាងត្បូង។ នេះដោយយោងតាមការផ្សាយរបស់ទីភ្នាក់ងារព័ត៌មាន Reuters។
ចិន និងសមាជិកអាស៊ាន សង្ឃឹមថា នឹងឯកភាពលើគោលការណ៍នេះ នៅឆ្នាំនេះ ១៥ឆ្នាំក្រោយពីពួកគេបានព្រាងវាឡើង។
ក្រុមអ្នកកាទូតអាស៊ានមួយចំនួន បានបង្ហាញក្ដីកង្វល់ថា តើចិននឹងចេតនាល្អឬទេ ឬក៏អាស៊ានមានអំណាចគ្រប់គ្រាន់សម្រាប់ធ្វើឲ្យចិនគោរពទៅតាមគោលការណ៍ទាំងនោះឬទេ។
បន្ទាប់ពីកិច្ចប្រជុំរវាងក្រុមមន្ត្រីអាស៊ាន និងចិន នៅទីក្រុងហ្គុយយ៉ាន់ ក្រសួងការបរទេសចិន បានប្រកាសថា សេចក្ដីព្រាងគោលការណ៍នោះ ត្រូវបានគេឯកភាពហើយ ប៉ុន្តែ ចិនមិនបានផ្ដល់ខ្លឹមសារលម្អិតនោះឡើយ។
ប្រទេសចិនបានអះអាងជាម្ចាស់លើដែនទឹកស្ទើតែទាំងអស់ ខណៈដែលប្រទេសប៊្រុយណេ ម៉ាឡេស៊ី ហ្វីលីពីន កោះតៃវ៉ាន់ និងវៀតណាម ក៏បានអះអាងជាម្ចាស់លើដែនទឹកនៅសមុទ្រចិនខាងត្បូងផងដែរ៕