សកម្មជនឃ្លាំមើលព្រៃឈើនៅកម្ពុជា បានឲ្យដឹងថា លោកបានទៅប្រទេសបារំាងនិងប្រទេសមួយចំនួនទៀត ដើម្បីជួបពិភាក្សាពង្រឹងការអនុវត្តន៍ច្បាប់បង្ក្រាបឧក្រិដ្ឋកម្មព្រៃឈើខុសច្បាប់ពីកម្ពុជា ទៅលក់នៅក្រៅប្រទេស ខណៈបទល្មើសព្រៃឈើកម្ពុជា នៅតែបន្តកើតមាន។
លោក អ៊ូច ឡេង ឲ្យដឹងថា លោកទៅប្រទេសបារំាង ប្រទេសប៉ទុយកាល់ និងប្រទេសអង់គ្លេសជាដើម។
ប្រធានក្រុមកិច្ចការពិសេសសិទ្ធិមនុស្សកម្ពុជា(CHRTF) រូបនេះបានផ្ញើសារប្រាប់VODតាមហ្វេសប៊ុកថា ចាប់ពីថ្ងៃទី១១មិថុនា ដល់ថ្ងៃទី២១ ខែដដែល លោកបានទៅជួបពិភាក្សាជាមួយប៉ូលីសអន្តរជាតិIntetpol នៅប្រទេសបារំាង ទីក្រុងហ្កាយយ៉ា ប្រទេសប៉ទុយកាល់ រួមទំាងនៅទីក្រុងឡុងដ៏ ប្រទេសអង់គ្លេស ដើម្បីជជែកពីការបង្កើតក្រុមការងារពង្រឹងការអនុវត្តន៍ច្បាប់បង្ក្រាបឧក្រិដ្ឋកម្មព្រៃឈើឲ្យមានប្រសិទ្ធិភាព ដោយថាលោកនឹងបង្ហាញពីភស្តុតាង ទាក់ទងអាជីវកម្មឈើឆ្លងដែនខុសច្បាប់ពីកម្ពុជាទៅលក់នៅអឺរ៉ុប វៀតណាម និងចិន ជាដើម។
អ្នកនាំពាក្យគណបក្សប្រជាជនកម្ពុជាលោក សុខ ឥសាន មានប្រសាសន៍ថា លោកគំាទ្រនឹងការផ្សព្វផ្សាយរបស់អ្នកឃ្លាំ មើលព្រៃឈើទៅកាន់ក្រៅប្រទេសនោះ ដោយថារដ្ឋាភិបាលកំពុងទប់ស្កាត់ការនាំឈើខុសច្បាប់ទៅលក់នៅក្រៅប្រទេសដែរ។ ប៉ុន្តែលោកថា ព្រៃឈើនៅកម្ពុជាមិនរងការកាប់បំផ្លាញទំាងស្រុងនោះទេ ដោយលោកថា បច្ចុប្បន្ននេះនៅសល់រហូតដល់៤៧ភាគរយ។
លោកនិយាយថា«៤៧ភាគគម្របព្រៃឈើធម្មជាតិ មិនរាប់បញ្ជូលទំាងដំណាំឧស្សាហកម្មផ្សេងៗ ដូចមានកៅស៊ូ ម្រេច ស្វាយចន្ទី អំពៅ ឬមួយដំណាំផ្សេងៗទៀត ដែលពាក់ព័ន្ធនឹងដំណាំឧស្សាហកម្មនេះពីព្រោះដំណាំឧស្សាហកម្មវាដូចព្រៃដែរ វាមានស្លឹកខៀវដែរ បញ្ហាសំខាន់វាមានចលនា…..ស្រូបយកអ៊ុកស៊ីសែន ហើយបញ្ចេញឧស្ម័នកាបូនិច ទោះបីដើមវាអីក៏ដោយ ដើមកៅស៊ូ ក៏វាជាព្រៃឈើដែរ គ្រាន់តែព្រៃឈើផ្នែកឧស្សាហកម្ម… គម្របនៅសល់៤៧ភាគរយ»។
កាលពីខែឧសភា ទីភ្នាក់ងារស៊ើបអង្កេតផ្នែកបរិស្ថាន ដែលមានមូលដ្ឋាននៅទីក្រុងឡុងដ៍ បានចេញរបាយការណ៍មួយ ក្រោមចំណងជើងថា «ជនល្មើសមុខដដែល៖ ជំនួញឈើខុសច្បាប់របស់វៀតណាម»។ក្នុងរបាយការណ៍នោះ រកឃើញថា នៅចន្លោះខែវិច្ឆិកាឆ្នាំ២០១៦ ដល់ខែមិនាឆ្នាំ២០១៧ ទំហំឈើប្រមាណ៣០ម៉ឺនមែត្រគូបត្រូវបានលួចលាក់នាំចេញនិងធ្វើឲ្យស្របច្បាប់ពីកម្ពុជាទៅវៀតណាម ខណៈដែលកម្ពុជាបានហាមឃាត់ការនាំចេញឈើក្នុងតំបន់ការពារទៅក្រៅប្រទេស។
អង្គការនេះថា ចាប់ពីដើមខែវិច្ឆិកាឆ្នាំ២០១៦ សកម្មភាពលួចកាប់ឈើខុសច្បាប់បានកើតឡើងខ្លាំងនៅតំបន់ការពារក្នុងខេត្តរតនគីរី ដូចជា តំបន់ការពារសហគមន៍ក្នុងឧទ្យានវីរជ័យ ឧទ្យានជាតិអូយ៉ាដាវ និងតំបន់ជម្រកសត្វព្រៃលំផាត់ ហើយបើគិតជាប្រាក់សំណូកគឺលើសពី១៣លានដុល្លារអាមេរិក។
បើតាមរបាយការណ៍សកម្មភាពលួចកាប់ និងនាំចូលឈើនេះ គឺដោយសារការឃុបឃិតគ្នា និងសូកប៉ាន់រវាងអាជ្ញាធរប្រទេសទាំងពីរ ដោយអង្គការនេះអះអាងថា ឈ្មួញវៀតណាមបានសូកប៉ាន់មន្ដ្រីខ្មែររាប់លាន់ដុល្លារ ដើម្បីចូលកាប់ឈើក្នុងតំបន់អភិរក្ស និងតំបន់ការពារក្នុងទឹកដីកម្ពុជា។
ទាក់ទិននឹងការកាប់ឈើខុសច្បាប់នេះ រដ្ឋាភិបាលបានបង្កើតគណៈកម្មការជាតិ ដើម្បីទប់ស្កាត់និងបង្ក្រាបបទល្មើសព្រៃឈើដែលដឹកនំាដោយលោក សៅ សុខា ប៉ុន្តែរដ្ឋាភិបាលមិនទាន់ចាប់ឈ្មួញឈើយកទៅផ្តន្ទាទោសនិងបង្ហាញលទ្ធផលនៃការបង្ក្រាបបទល្មើសព្រៃឈើជាសាធារណៈនៅឡើយ បើទោះជាលោកនាយករដ្ឋមន្រ្តី ហ៊ុន សែន ធ្លាប់បានដៅឈ្មោះឧកញ៉ាយ៉ាងតិចពីរនាក់ដែលនាយករដ្ឋមន្រ្តីថាជាអ្នករកស៊ីឈើទៅលក់នៅប្រទេសវៀតណាម៕