មេដឹកនាំគណបក្សប្រឆំាងបានឲ្យដឹងថា លោកប្តេជ្ញាពង្រឹងផ្ទៃក្នុងបក្សឲ្យរឹងមំា ដោយថាដើម្បីដណ្តើមយកជ័យជំនះការបោះឆ្នោតថ្នាក់ជាតិឆ្នាំ២០១៨ខាងមុខនេះ។
ការលើកឡើងរបស់លោក កឹម សុខា គឺក្នុងខួបកំណើតគណបក្សសង្គ្រោះជាតិ គម្រប់៥ឆ្នាំ ដែលបង្កើត កាលពីថ្ងៃទី១៧ ខែកក្កដា។ លោក កឹម សុខា បានថ្លែងថា គណបក្សសង្គ្រោះជាតិមានបញ្ហាច្រើន ក្រោយពីគណបក្សសិទ្ធិមនុស្ស រួមគ្នាជាមួយគណបក្សសម រង្ស៊ី ដើម្បីប្រកួតប្រជែងការបោះឆ្នោត២០១៣ លោកថានៅគ្រានោះមានអ្នកនយោបាយខ្លះ ដោយ(ទំនងជាសំដៅដល់បក្សកាន់អំណាច) ព្យាយាមបំបែកបំបាក់ផ្ទៃក្នុងគណបក្សប្រឆំាងនេះរហូតដល់បច្ចុប្បន្ននេះ។
ទោះជាយ៉ាងណាលោកថា គណបក្សសង្គ្រោះជាតិនៅតែរឹងមាំ និងកាន់តែមានការគំាទ្រពីប្រជាពលរដ្ឋ ខណៈសំឡេងឆ្នោតកើនឡើងជាបន្តបន្ទាប់។
ករណីនេះ លោក កឹម សុខា ប្តេជ្ញាថានឹងរួមគ្នាពង្រឹងផ្ទៃក្នុងបក្ស ដើម្បីឈ្នះការបោះឆ្នោតឆ្នាំ២០១៨ គ្រប់គ្រងរដ្ឋាភិបាល។
លោកនិយាយថា «ទីមួយយើងរួមបានហើយ ទីពីរយើងរឹងហើយ គេវ៉ៃលែងបែក លែងបាក់ ជំហ៊ានទីបី យើងធ្វើឲ្យរីក[ចំរើន] មានន័យថាយើងបើកចិត្តឲ្យទូលាយ ដើម្បីប្រមូលកម្លាំងអ្នកប្រជាធិបតេយ្យ អ្នកស្នេហាជាតិនៅគ្រប់មជ្ឈដ្ឋានឲ្យមកចូលរួម គឺមិនមែនមានតែយើងទេ កាលណាធ្វើគណបក្សនយោបាយមួយ មានតែអញ[ខ្លួន]គឺថាអត់មានកម្លាំងល្អ អត់មានកម្លាំងល្អ អត់អាចយកជ័យជំនះបានទេ ខ្ញុំសូមយកឱកាសនេះជម្រាបជូនថា អ្នកដឹកនាំគណបក្សដែលពូកែ អត់ពីខ្លួនទៅ គឺគណបក្សហ្នឹងនៅតែរស់ រវើក ហើយនៅរីកបន្តទៀត មិនមែនអន្តរាយ មិនមែនរលាយ ដូចគ្នាដែរ អ្នកដឹកនាំប្រទេសដែលពូកែ គឺអ្នកដឹកនំាប្រទេសដែលអត់ពីខ្លួនទៅ ប្រទេសនៅតែរីកទៅមុខ មិនមែនអត់ពីខ្លួនទៅប្រទេសរលាយ ប្រទេសសង្គ្រាមទេ អាហ្នឹងអ្នកដឹកនាំប្រទេសអត់ពូកែទេ»។
នៅថ្ងៃទី១៩ ខែកក្កដានេះ លោកនាយករដ្ឋមន្ត្រី ហ៊ុន សែន បានសរសេរលើហ្វេសប៊ុករបស់លោកថា មានតែគណបក្សប្រជាជនកម្ពុជាទេ ដែលដឹកនាំប្រទេសឲ្យមានសន្តិភាព តាមរយៈការគំាទ្រពីពលរដ្ឋម្ចាស់ឆ្នោត។
លោកនិយាយថា «សន្តិភាព គណបក្សប្រជាជន គឺសន្តិភាព នៅក្រោមស្នាដៃដឹកនាំដ៏ឆ្នើមរបស់ សម្តេចតេជោ ហ៊ុន សែន បានធ្វើអោយកម្ពុជា មានសុខសន្តិភាព យូរអង្វែង ដែលផ្តល់នូវភាពកក់ក្តៅដល់ប្រជាពលរដ្ឋខ្មែរគ្រប់ៗរូប យើងទាំងអស់គ្នា គោរពស្រឡាញ់ ជឿទុកចិត្ត និងគាំទ្រ សម្តេចតេជោ ហ៊ុន សែន យើងទាំងអស់គ្នា បោះឆ្នោតអោយតែ គណបក្សប្រជាជនកម្ពុជា តែមួយប៉ុណ្ណោះ»។
អ្នកនាំពាក្យគណបក្សប្រជាជនកម្ពុជាលោក សុខ ឥសាន មានប្រសាសន៍ថា បើគណបក្សសង្គ្រោះជាតិធ្វើបានតាមការលើកឡើងនោះជាការល្អ ដោយថាកុំឲ្យប្រើយុទ្ធសាស្ត្រកុហកពលរដ្ឋម្ចាស់ឆ្នោតម្តងហើយម្តងទៀត។ ទោះជាយ៉ាងណាលោកថា គណបក្សប្រឆំាងមិនអាចឈ្នះគណបក្សប្រជាជនបានទេ ដោយថាបក្សកាន់អំណាចព្យាយាមធ្វើកំណែទម្រង់ច្រើនជូនពលរដ្ឋម្ចាស់ឆ្នោត។
លោកនិយាយថា «បក្សប្រជាជនដែលជាដៃគូប្រកួតជាមួយគណបក្សសង្គ្រោះជាតិអត់មានព្រួយបារម្ភអ្វីទេយើងព្រួយបារម្ភតែធ្វើខុស បើយើងអត់ធ្វើខុសអ្វីផង រឿងអ្វីអាណត្តិទី៦ យើងសង្ឃឹមចាញ់ ព្រោះការធ្វើ ដើម្បីឈ្នះ ហើយធ្វើការកសាងសម្មិតផលនានា កែទម្រង់លើគ្រប់វិស័យនានា ដើម្បីទាក់ទាញចិត្តពីប្រជាពលរដ្ឋឲ្យបន្តការគំាទ្រ យើងឃើញហើយការបោះឆ្នោតឆ្នាំ២០១៧ ទោះបីបាត់អាសនៈមេឃុំមួយចំនួនក៏ពិតមែន ក៏ប៉ុន្តែសន្លឹកឆ្នោតឡើង៣សែនសំឡេង»។
អ្នកស្រាវជ្រាវពីការអភិវឌ្ឍសង្គមលោក មាស នី យល់ថា ការពង្រឹងផ្ទៃក្នុងបក្សជារឿងល្អ សម្រាប់អ្នកនយោបាយទំាងអស់ត្រូវតែធ្វើ។ ប៉ុន្តែលោកថា អ្នកដែលជាប់មេឃុំឬចៅសង្កាត់ថ្មី នៅអាណត្តិនេះ ត្រូវបំរើសេវាជូនប្រជាពលរដ្ឋដោយឥតលម្អៀង ដោយថាដើម្បីទាក់ទាញប្រជាប្រិយភាពឲ្យគណបក្ស។
លោកមានប្រសាសន៍ថា «មន្ត្រីរដ្ឋនៅតាមមូលដ្ឋានត្រូវតែដូរវប្បធម៌ថ្មីមួយ គឺការធ្វើការដោយមិនមានការរើសអើង បានន័យថាដូរអាវបក្សចេញ ហើយពាក់អាវមេឃុំ ហើយតំាងខ្លួនជាមន្ត្រីរបស់រដ្ឋ ដើម្បីជួយធ្វើយ៉ាងម៉េច ឲ្យមានការផ្តល់ការគំាទ្រឲ្យបានស្មើភាពគ្នាទៅលើពលរដ្ឋទំាងអស់ដែលនៅក្នុងឃុំរបស់ខ្លួន ហើយចាត់ទុកថាជាផ្លូវមួយល្អ សម្រាប់សង្គមខ្មែរទៅថ្ងៃមុខ វាក៏ជាផ្នែកមួយដែលធ្វើឲ្យខ្លួឯងកើនឡើង សម្រាប់ទទួលការបោះឆ្នោត ទទួលនៅជ័យជំនះបោះឆ្នោតខាងមុខដែរ»។
សូមរំឮកថា គណបក្សសង្គ្រោះជាតិ គឺជាការច្របាច់បញ្ចូលរវាងគណបក្ស សម រង្ស៊ី របស់លោក សម រង្ស៊ី និងគណបក្សសិទ្ធិមនុស្សរបស់លោក កឹម សុខា កាលពីថ្ងៃទី១៧កក្កដាឆ្នាំ២០១២ នៅឯទីក្រុងម៉ានីល ប្រទេសហ្វីលីពីន។
ដំបូងឡើយ គណបក្សសង្គ្រោះជាតិបានជ្រើសយក លោក សម រង្ស៊ី ជាប្រធានគណបក្ស និងលោក កឹម សុខា ជាអនុប្រធាន។ ប៉ុន្ដែមានការផ្លាស់ប្ដូរសមាសភាពក្បាលម៉ាស៊ីនដឹកនាំជាបន្ដបន្ទាប់ ដោយពេលនេះ លោក កឹម សុខា ក្លាយជាប្រធានគណបក្ស និងមានអនុប្រធាន៣រូបទៀត ខណៈលោក សម រង្ស៊ី ត្រូវបានគេផាត់ចេញពីឆាកនយោបាយដោយសារតែច្បាប់ថ្មីដ៍ចម្រូងចម្រាស់ដែលលោក ហ៊ុន សែន ស្នើឲ្យកែប្រែ៕