មន្រ្តីព្រំដែនខេត្តបន្ទាយមានជ័យត្អូនត្អែរពីការលំបាកក្នុងការទប់ស្កាត់ការនាំចូលមាន់ និងទាខុសច្បាប់ពីប្រទេសថៃ តាមច្រករបៀង ដោយសារឈ្មួញលួចនាំចូលពេលយប់អធ្រាត្រ។
ការលើកឡើងបែបនេះតាមរយៈទំព័រហ្វេសប៊ុករបស់អគ្គស្នងការនគរបាលជាតិចុះផ្សាយកាលពីថ្ងៃទី១៨ ខែ សីហា ស្ដីពីការព្រួយបារម្ភរបស់មន្រ្តីគយ និង រដ្ឋាករព្រំដែនអន្តរជាតិប៉ោយប៉ែត ពីការបាត់បង់ចំណូលពន្ធចូលរដ្ឋ ដោយសារមន្រ្តីព្រំដែនបណ្ដោយឲ្យមានការនាំចូលមាន់ និង ទាខុសច្បាប់តាមច្រករបៀង។
មន្រ្តីគយ និង រដ្ឋាករបានលើកឡើងថាមានឈ្មួញនាំចូលមាន់និងទាពីប្រទេសថៃខុសច្បាប់ទាំងថ្ងៃទាំងយប់រាប់ ពាន់ក្បាល តាមច្រករបៀងដូចជាច្រក អូរបីជាន់ស្រុកអូរជ្រៅ និងតាមច្រករបៀងមួយចំនួនទៀត។
ក្នុងទំព័រហ្វេសប៊ុកអគ្គស្នងការនគរបាលជាតិដដែលបានលើកឡើងនូវប្រសាសន៍របស់ប្រធានការិយាល័យផលិកម្ម និងបសុព្យាបាលខេត្តបន្ទាយមានជ័យ លោក ហ៊ុយ តូច ដោយទទួលស្គាល់ថាមានការនាំចូលមាន់ និងទាខុសមែន។ លោកបន្តថាករណីនេះមានតិចតួចព្រោះមន្ត្រីជំនាញពិបាកចុះធ្វើការពារដោយសារឈ្មួញលួចចូលពេលយប់តាមបន្ទាត់ព្រំដែន។
លោក ហ៊ុយ តូច បញ្ជាក់ថាការនាំចូលមាន់និងទាពីប្រទេសថៃចូលមកកម្ពុជានេះគឺមានក្រុមហ៊ុនចំនួន៣ គឺក្រុមហ៊ុនចន្ធូមានជ័យ ក្រុមហ៊ុនសេងវណ្ណាគ្រប់ ក្រុមហ៊ុនវ៉ាញកូដ ដែលត្រូវបាននាំចូលមានច្រករបៀងអូរបីជាន់ ស្រុកអូរជ្រៅ និច្រកតំបន់ព្រំដែនបឹងត្រកួនស្រុកថ្មពួក។ ក្រុមហ៊ុននីមួយៗមានច្បាប់នាំចូល១ថ្ងៃ ៣,០០០ក្បាល ដែលត្រូវបានបង់ពន្ធមាន់ ឬទា១ក្បាលតំលៃ២០០រៀល៕