អង្គការសិទ្ធិមនុស្សអន្តរជាតិមួយទៀត បានហៅរដ្ឋាភិបាលកម្ពុជាថា កំពុងប្រើប្រាស់ច្បាប់ និងក្រុមមន្ត្រីតុលាការមិនឯករាជ្យ ដើម្បីបំបាត់សំឡេងប្រឆាំង និងកម្ទេចប្រជាធិបតេយ្យនៅកម្ពុជា បន្ទាប់ការចាប់ខ្លួនមេដឹកនាំបក្សប្រឆាំង និងការប៉ុនប៉ងរំលាយបក្សប្រឆាំង ក្រោយការកែច្បាប់ ៤ ដែលពាក់ព័ន្ធនឹងការបោះឆ្នោត។
ប្រធានគណបក្សសង្គ្រោះជាតិ លោក កឹម សុខា ត្រូវបានអាជ្ញាធរកម្ពុជាចាប់ខ្លួនទាំងកណ្ដាលយប់ឈានចូលថ្ងៃទី០៣ ខែកញ្ញា ក្រោមការចោទប្រកាន់ពីរដ្ឋាភិបាលថា «ក្បត់ជាតិ» ជុំវិញការថ្លែងរបស់លោកនៅអូស្ត្រាលីកាលពីឆ្នាំ២០១៣។
ក្រោយមេដឹកនាំបក្សប្រឆាំងរូបនេះត្រូវបានចាប់ខ្លួន ក្រុមតំណាងរាស្ត្រគណបក្សប្រជាជនកម្ពុជាកំពុងកាន់អំណាចនោះ បានឈានទៅអនុម័តសំណើកែប្រែច្បាប់ ៤ ពាក់ព័ន្ធនឹងការបោះឆ្នោត ដែលវិសោធនកម្មច្បាប់ទាំង ៤នោះ ត្រូវបានគេមើលឃើញថា ជាការប៉ុនប៉ងឈានទៅរំលាយគណបក្សសង្គ្រោះជាតិ ប្រសិនបើសំណើវិសោធនកម្មច្បាប់នោះ ត្រូវបានដាក់ឲ្យចូលជាធរមាននោះ។
តំណាងរាស្ត្របក្សកាន់អំណាច លោក ជៀម យាប បានថ្លែងនៅក្នុងកិច្ចប្រជុំសភាកាលពីថ្ងៃទី១៦ ខែតុលានេះថា សំណើកែប្រែច្បាប់នេះ ត្រូវបានធ្វើឡើងសំដៅលើសកម្មភាពក្បត់ជាតិរបស់មេដឹកនាំបក្សប្រឆាំង លោក កឹម សុខា ដែលបក្សកាន់អំណាចចោទថា បានប្រព្រឹត្តអំពើ «ក្បត់ជាតិ»។
គណៈកម្មការអ្នកច្បាប់អន្តរជាតិ ហៅកាត់ថា ICJ ដែលមានមូលដ្ឋាននៅក្នុងទីក្រុងហ្សឺណែវ ប្រទេសស្វីស បានចេញរបាយការណ៍មួយនៅថ្ងៃនេះ ក្រោមចំណងជើងថា «ការសម្រេចបានយុត្តិធម៌សម្រាប់ការរំលោភសិទ្ធិមនុស្សនៅកម្ពុជា»។
ក្រុមសិទ្ធិមនុស្សអន្តរជាតិនេះ បានលើកនៅក្នុងរបាយការណ៍នោះថា កម្ពុជាកំពុងប្រើប្រាស់ច្បាប់ និងកំពុងពឹងផ្អែកលើចៅក្រម និងព្រះរាជអាជ្ញាមិនឯករាជ្យ ដើម្បីបំបាត់សំឡេងប្រឆាំង និងកម្ទេចប្រជាធិបតេយ្យ។
ទីប្រក្សាជាន់ខ្ពស់ផ្នែកច្បាប់អន្តរជាតិប្រចាំនៅការិយាល័យ ICJ ក្នុងទីក្រុងបាងកក បានលើកឡើងនៅរបាយការណ៍នោះថា សំណើវិសោធនកម្មច្បាប់ថ្មីៗនេះ គឺស្ថិតនៅក្នុងចំណោមករណីជាច្រើនទៀត ដែលរដ្ឋាភិបាលកម្ពុជាបានអនុម័ត ឬក៏កែប្រែច្បាប់ដោយឥតអៀនខ្មាស ជាមួយនឹងគោលបំណងរំលោភបំពានគូប្រជែង ឬក៏ធ្វើឲ្យប្រជាធិបតេយ្យនៅក្នុងប្រទេសនេះ ចុះខ្សោយយ៉ាងពិតប្រាកដ។
រដ្ឋាភិបាលកម្ពុជាដឹកនាំដោយលោកនាយកដ្ឋមន្ត្រី ហ៊ុន សែន ត្រូវបានសហគមន៍អន្តរជាតិរិះគន់ និងថ្កោលទោសជាបន្តបន្ទាប់ គិតចាប់តាំងពីការចាប់ខ្លួនលោក កឹម សុខា។
ជាងនេះទៅទៀត សហរដ្ឋអាមេរិក និងសហភាពអឺរ៉ុប ព្រមទាំងអង្គការសិទ្ធិមនុស្សអន្តរជាតិនានា បានជំរុញទៅរដ្ឋាភិបាលកម្ពុជា ឲ្យដោះលែងដោយឥតលក្ខខណ្ឌ នូវមេដឹកនាំបក្សប្រឆាំង លោក កឹម សុខា ដែលកំពុងដាក់ឲ្យស្ថិតក្រោមការឃុំខ្លួននៅពន្ធនាគារត្រពាំងផ្លុង ស្ថិតក្នុងខេត្តត្បូងឃ្មុំ៕