រដ្ឋមន្ត្រីការបរទេសអាមេរិក លោក Rex Tillerson បានលើកឡើងកាលពីថ្ងៃម្សិលមិញថា អាមេរិកបានដាក់ការទទួលខុសត្រូវទៅលើមេដឹកនាំយោធាភូមា សម្រាប់វិបត្តិជនជាតិរ៉ូហ៊ីងយ៉ា ដោយទាញបញ្ហានេះឲ្យនៅឆ្ងាយដាច់ដោយឡែកពីរដ្ឋាភិបាលស៊ីវិលរបស់អ្នកស្រី អ៊ុងសាន ស៊ូជី។ នេះដោយយោងតាមសេចក្ដីរាយការណ៍របស់ទីភ្នាក់ងារព័ត៌មាន AFP។
ការវិលត្រឡប់ទៅរករបបស៊ីវិលវិញរបស់ភូមា បានផ្ដល់ឲ្យប្រទេសនេះនូវរដ្ឋាភិបាលកូនកាត់មួយ ដែលនៅក្នុងនោះ ពួកយោធា នៅតែបន្តមានអំណាចទូលំទូលាយនៅក្នុងវិស័យសន្តិសុខ និងនៅរដ្ឋរ៉ាក់ឃីន ជាទីដែលអង្គការសហប្រជាជាតិ បានរាយការណ៍អំពីការបោសសម្អាតជាតិសាសន៍។
លោក Tillerson បានថ្លែងថា អាមេរិកមានក្ដីបារម្ភខ្លាំងនូវអ្វីដែលកំពុងកើតឡើងចំពោះជនជាតិរ៉ូហ៊ីងយ៉ានៅភូមា។ លោកបន្ថែមថា លោកបានទាក់ទងជាមួយអ្នកស្រី ស៊ូជី មេដឹកនាំស៊ីវិលនៅក្នុងរដ្ឋាភិបាល ដែលជាការបែងចែកអំណាច។
លោកអះអាងថា អាមេរិកបានចាប់មេដឹកនាំយោធាភូមាឲ្យទទួលខុសត្រូវលើអ្វីដែលកំពុងកើតឡើង ដោយលោកព្រមានថា ពិភពលោកនឹងមិនឈរនៅស្ងៀមនោះឡើយ ហើយកំពុងតែតាមដានភាពឃោឃៅដែលត្រូវបានគេរាយការណ៍។
នៅក្នុងរយៈពេល ៧សប្ដាហ៍ចុងក្រោយនេះ ជនជាតិរ៉ូហ៊ីងយ៉ាជាងកន្លះលាននាក់ហើយ បានរត់ភៀសខ្លួន និងឆ្លងដែនចូលទៅក្នុងប្រទេសបង់ក្លាដែស។
រឿងរ៉ាវរបស់ជនជាតិរ៉ូហ៊ីងយ៉ា បានធ្វើឲ្យពិភពលោកតក់ស្លុត ដោយសារតែការទទួលខុសត្រូវរបស់ទាហាន និងក្រុមអន្ធពាលភូមាចំពោះការសម្លាប់ និងការរំលោភផ្លូវភេទជនស៊ីវិល មុននឹងពួកគេកម្ទេចភូមិដ្ឋានរាបដល់ដី៕
