មន្ត្រីធ្វើការងារលើកស្ទួយសិទ្ធិស្ត្រី ស្នើទៅអាជ្ញាធរចាត់វិធានការច្បាប់លើអ្នកដែលបានថតរូបអាក្រាតនៃសពរបស់តារាចម្រៀង សាន ស្រីឡៃ ចែកចាយក្នុងបណ្ដាញសង្គម ដោយថាធ្វើឲ្យប៉ះពាល់ដល់បូរណភាពនៃសាកសព និងស្ត្រីផ្សេងទៀត នៅក្នុងប្រទេសកម្ពុជា។
ការស្នើចាត់វិធានការច្បាប់នេះ ធ្វើឡើងបន្ទាប់ពីមានការរិះគន់ជាបន្តបន្ទាប់ ពីអ្នកប្រើប្រាស់បណ្ដាញសង្គមមួយចំនួន ជុំវិញការបង្ហាញរូបអាក្រាតនៃសពរបស់តារាចម្រៀង សាន ស្រីឡៃ ក្រោយការធ្វើកោសល្យវិច័យសាកសព។
នាយិកាអង្គការយ៉េនឌី និងអភិវឌ្ឍន៍ដើម្បីកម្ពុជា (GADC) លោកស្រី រស់ សុភាព បានប្រាប់VODនៅថ្ងៃទី១៩ខែតុលានេះថា ការថត និងចែកចាយរូបអាក្រាតរបស់ជនរងគ្រោះ ជាពិសេសស្ត្រី មិនមែនមានតែករណីតារាចម្រៀង សាន ស្រីឡៃ តែម្នាក់នោះទេ។ លោកស្រីថា ករណីបែបនេះ កើតឡើងជាញឹកញាប់ទៅលើស្ត្រី ដែលរងគ្រោះដោយសាររំលោភផ្លូវភេទ អំពើហិង្សា និងឃាតកម្មជាដើម។
លោកស្រី រស់ សុភាព ហៅទង្វើរបស់អ្នកបង្ហាញរូបអាក្រាតស្ត្រីបែបនេះថា ជាការរំលោភបំពានទៅលើសេចក្ដីថ្លៃថ្នូររបស់សព ក្រុមគ្រួសារ និងស្ត្រីផ្សេងៗទៀត នៅក្នុងប្រទេសកម្ពុជា។ លោកស្រី ស្នើទៅអាជ្ញាធរចាត់វិធានការច្បាប់លើបុគ្គលដែលបង្ហាញរូបអាក្រាតតារាចម្រៀងរូបនោះ ដោយថាកុំឲ្យបន្តកើត មានឡើងទៀតនៅក្នុងប្រទេសកម្ពុជា។
លោកស្រីនិយាយថា«សមត្ថកិច្ចត្រូវមានវិធានការ ក្នុងការស្វែងរកធ្វើការងារហ្នឹង ដើម្បីទប់ស្កាត់កុំឲ្យមានកើតបន្តទៀត ហើយបើកើតបន្តទៀតវាធ្វើឲ្យសីលធម៌របស់កម្ពុជាធ្លាក់ចុះខ្លំាង»។
លោកស្រី រស់ សុភាព ផ្តល់ជាយោបល់បន្ថែមថា ស្ត្រីដែលធ្វើការងារជំនាញផ្នែកកោសល្យវិច័យលើស្ត្រីរងគ្រោះ ពីការរំលោភផ្លូវភេទ អំពើហិង្សា និងសាកសពជាដើម គឺមានតិចតួចនៅឡើយ។ ករណីនេះ លោកស្រី ស្នើទៅស្ថាប័នពាក់ព័ន្ធត្រូវបន្ថែមស្ត្រី ធ្វើការងារកោសល្យវិច័យ ឲ្យមានចំនួនប្រហាក់ប្រហែលបុរស ដោយថា ការពារកុំឲ្យប៉ះពាល់ដល់ស្ត្រីរងគ្រោះ នៅពេលធ្វើកោសល្យវិច័យរកភស្តុតាង។
VOD មិនអាចសុំការបំភ្លឺពីស្នងការនគរបាលរាជធានីភ្នំពេញលោក ជួន សុវណ្ណ និងលោក គៀត ច័ន្ទថារិទ្ធ អ្នកនាំពាក្យនគរបាលជាតិបានទេនៅថ្ងៃនេះ ដោយទូរសព្ទចូលមិនមានអ្នកទទួល។
ប៉ុន្តែកាលពីថ្ងៃទី១៨ខែតុលាម្សិលមិញ លោក ជួន សុវណ្ណ បានថ្លែងប្រាប់សារព័ត៌មានក្នុងស្រុកថា ក្រុមការងារកំពុងស្រាវជ្រាវករណីនេះ ដោយថា បើរកឃើញថា មន្ត្រីនគរបាលផ្នែកកោសល្យវិច័យសាកសព ជាអ្នកបញ្ចេញរូបអាក្រាតនោះមែន លោកថានឹងចាត់វិធានការតាមច្បាប់ ព្រោះវាធ្វើឲ្យប៉ះពាល់ដល់កិត្តិយសរបស់សព វិជ្ជាជីវៈ និងក្រមសីលធម៌នគរបាល។
មាត្រា២៦១ និង២៦៤ នៃក្រមព្រមទណ្ឌមានខ្លឹមសារថា អំពើប៉ះពាល់ដល់បូរណភាពនៃសាកសព ត្រូវផ្តន្ទាទោសដាក់ពន្ធនាគារពី១ខែទៅ១ឆ្នាំ។ បទល្មើសនេះក៏មានទោសបន្ថែម ចំពោះអ្នកប្រព្រឹត្តក្នុងការប្រកបវិជ្ជាជីវៈ ពោលត្រូវហាមឃាត់ចំពោះការប្រកបវិជ្ជាជីវៈរយៈពេល៥ឆ្នាំយ៉ាងច្រើន។
តារាចម្រៀង សាន ស្រីឡៃ ត្រូវបានអតីតស្វាមីបាញ់ចំនួន៣គ្រាន់ ហើយឃាតករនោះ បាញ់សម្លាប់ខ្លួនឯង បណ្តាលឲ្យស្លាប់ភ្លាមៗ កាលពីថ្ងៃទី១៦ ខែតុលា នៅហាងកែសម្ផស្សមួយកន្លែង ក្បែរស្ថានីយ៍ទូរទស្សន៍អប្សរា ស្ថិតនៅសង្កាត់បឹងកេងកង១ ខណ្ឌចំការមន រាជធានីភ្នំពេញ។ បើតាមក្រុមគ្រួសារឲ្យដឹងថា ករណីបាញ់សម្លាប់នេះទំនងជាអតីតស្វាមីប្រច័ណ្ឌតារារូបនោះ៕