អង្គការសុខភាពពិភពលោកWHO ប្រកាសនៅថ្ងៃសុក្រម្សិលមិញថា ការឆ្លងរាលដាលនៃមេរោគហ្ស៊ីកានៅតែចោទជា បញ្ហា ហើយមិនយូរទៀតទេ ជំងឺនេះ នឹងក្លាយជាជំងឺប្រកាសអាសន្នជាសាធារណៈ ដែលគំរាមកំហែងដល់ក្បាល និង ខួរក្បាលរបស់ទារក។
ប្រេស៊ីលគឺជាប្រទេស ដែលចាប់ផ្តើមរាលដាលមុនគេនៃមេរោគហ្ស៊ីកា ហើយបញ្ជាក់ថា ការរាលដាលមិនបានថយចុះទេ ខណៈអង្គការសុខភាពពិភពលោករកឃើញថា មេរោគនេះ កំពុងធ្វើឲ្យប៉ះពាល់ធ្ងន់ធ្ងរដល់ការវិវត្តន៍រាងកាយមនុស្ស។ នេះបើតាមទីភ្នាក់ងារសារព័ត៌មានAFP។
មេរោគហ្ស៊ីកា មានអាការៈស្រាលបំផុតចំពោះមនុស្សទូទៅ ប៉ុន្តែវាផ្តល់ហានិភ័យខ្លាំងសម្រាប់ស្ត្រីមានផ្ទៃពោះគឺនាំឲ្យកុមារកើតមកមានក្បាលតូច ដែលនាំឲ្យខូចទ្រង់ទ្រាយ ដោយសារបញ្ហាក្បាល និង ខួរក្បាលតូច។
មេរោគនេះបានផ្ទុះឡើងខ្លាំងនៅក្នុងប្រទេសប្រេស៊ីលកាលពីពាក់កណ្តាលឆ្នាំ២០១៥ ហើយបានធ្វើឲ្យឆ្លងទៅមនុស្សចំនួន១លាន៥សែននាក់ គ្រាន់តែនៅប្រេស៊ីលគឺមានកុមារកើតមកចំនួន ១៦០០នាក់ មានបញ្ហាក្បាលតូច តាមរបាយការណ៍កាលពីឆ្នាំមុនរបស់អង្គការសុខភាពពិភពលោក។
អង្គការសុខភាពពិភពលោកបានប្រកាសអាសន្នពីការឆ្លងរាលដាលនៃជំងឺប្រភេទនេះ កាលពីខែកុម្ភះឆ្នាំ២០១៦ ដើម្បីឲ្យប្រទេសនានា និងអ្នកទេសចរណ៍មានការប្រុងប្រយ័ត្ន។
ក្រុមអ្នកស្រាវជ្រាវព្រមានថា មនុស្សប្រមាណ២,៦ ពាន់លាននាក់ប្រឈមនឹងការឆ្លងមេរោគហ្ស៊ីកានៅឆ្នាំនេះ ដែលជាការផ្ទុះឡើងក្នុងដំណាក់កាលទី៣។