មន្ត្រីជាន់ខ្ពស់នៃក្រសួងពាណិជ្ជកម្ម បានអំពាវនាវទៅសហភាពអឺរ៉ុប ឲ្យបង្កើនការបញ្ជាទិញ និងបន្តការអនុគ្រោះពន្ធគយសម្រាប់ទំនិញកម្ពុជា ដោយប្រាប់ទៅសហភាពអឺរ៉ុប កុំឲ្យភ្ជាប់បញ្ហានយោបាយនឹងបញ្ហាពាណិជ្ជកម្មទ្វេភាគី។
ដែលការអំពាវនាវនេះ ត្រូវបានធ្វើឡើងបន្ទាប់ពីសភាអឺរ៉ុបព្រមានផ្អាកជាបណ្ដោះអាសន្ននូវការផ្ដល់ភាពអនុគ្រោះពន្ធនេះ។
ថ្លែងក្នុងកម្មវិធីផ្សព្វផ្សាយរបាយការណ៍ស្តីពី «ការវាយតម្លៃអំពីសុចរិតភាពធុរកិច្ចថ្នាក់ជាតិ» នៅព្រឹកមិញនេះ អនុរដ្ឋលេខាធិការក្រសួងពាណិជ្ជកម្ម លោក រាជ្យ រ៉ា បានស្នើទៅកាន់តំណាងសហភាពអឺរ៉ុបដែលបានចូលរួមក្នុងពិធីនោះដែរ ឲ្យជួយទិញទំនិញកម្ពុជាបន្ថែមទៀត។ លោកក៏បានស្នើទៅសហភាពអឺរ៉ុប ឲ្យបន្តផ្ដល់ភាពអនុគ្រោះពន្ធគយសម្រាប់កម្ពុជាផងដែរ ដោយថា ប្រព័ន្ធអនុគ្រោះពន្ធគយ «អ្វីៗគ្រប់យ៉ាងលើកលែងតែអាវុធ»របស់អឺរ៉ុប បានផ្ដល់អត្ថប្រយោជន៍ធំធេងដល់កម្ពុជា។
លោកមានប្រសាសន៍ថា៖ «ខ្ញុំសង្ឃឹមថា សគមន៍អឺរ៉ុបនឹងនៅតែបន្តផ្តល់ និងបន្តបញ្ជាទិញទំនិញពីកម្ពុជាបន្តទៀត ហើយសូមកុំភ្ជាប់រឿងនយោបាយទៅរឿងសេដ្ឋកិច្ច និងពាណិជ្ជកម្មរបស់កម្ពុជា គឺថា កុំមើលព្រៃ(ដើមឈើ)មួយដើមៗ តែត្រូវមើលព្រៃទាំងមូល»។
VOD មិនទាន់អាចស្វែងរកការឆ្លើយតបពីសហភាពអឺរ៉ុបបាននៅឡើយទេចំពោះការអំពាវនាវនេះ។
មន្ត្រីពាណិជ្ជកម្មកម្ពុជារូបនេះ បានអំពាវនាវបែបនេះ បន្ទាប់ពីសភាសហភាពអឺរ៉ុប បានសម្រេចឲ្យគណៈកម្មការអឺរ៉ុប ផ្អាកជាបណ្ដោះអាសន្ននូវការផ្ដល់ភាពអនុគ្រោះពន្ធគយសម្រាប់ទំនិញនាំចូលពីកម្ពុជា ដែលជាការឆ្លើយតបទៅនឹងការរំលាយគណបក្សសង្គ្រោះជាតិ និងការចាប់ខ្លួនមេបក្សប្រឆាំង លោក កឹម សុខា ដាក់ពន្ធនាគារ ក្រោមការចោទថា «ក្បត់ជាតិ»។
ការអំពាវនាវបែបនេះរបស់មន្ត្រីក្រសួងពាណិជ្ជកម្មរូបនេះ កើតឡើងបន្ទាប់ពីរដ្ឋមន្ត្រីពាណិជ្ជកម្ម លោក ប៉ាន សូរស័ក្តិ កាលពីដើមខែនេះ បានផ្ដល់មតិទៅលោកនាយករដ្ឋមន្ត្រី ហ៊ុន សែន ឲ្យប្រើប្រាស់វិធីសាស្ត្រការទូត បញ្ចុះបញ្ចូលប្រទេសជាសមាជិកសហភាពអឺរ៉ុប ដើម្បីបញ្ចៀសការសម្រេចព្យួរភាពអនុគ្រោះពន្ធគយសម្រាប់ទំនិញកម្ពុជានាំចូលទីផ្សារអឺរ៉ុប។
ទំនិញកម្ពុជានាំចូលទីផ្សារអឺរ៉ុប ត្រូវបានលោក ប៉ាន សូរស័ក្តិ រាយការណ៍ប្រាប់ទៅលោក ហ៊ុន សែន ថា មានទំហំដល់ទៅ ៦ពាន់ ២៥៩លានដុល្លារ កាលពីឆ្នាំ២០១៦កន្លងមក ដែលឆ្លុះបញ្ចាំងថា អឺរ៉ុបគឺជាទីផ្សារធំបំផុតសម្រាប់ទំនិញកម្ពុជាចាប់ពីផលិតផលកាត់ដេរ រហូតដល់ទំនិញកសិកម្ម។
ដោយស្ថិតនៅក្រោមប្រព័ន្ធអនុគ្រោះពន្ធ រដ្ឋមន្ត្រីពាណិជ្ជកម្ម បានប្រាប់ទៅលោកនាយករដ្ឋមន្ត្រីថា កម្ពុជាពុំតម្រូវឲ្យបង់ពន្ធរហូតដល់ទៅ ៦៧៦លានដុល្លារក្នុងមួយឆ្នាំ ហើយថា ទំនិញកម្ពុជាដែលនាំចូលទៅទីផ្សារអឺរ៉ុប ត្រូវបានផលិតឡើងដោយកម្មករប្រហែល ៤០ម៉ឺននាក់៕