សាច់ញាតិអតីតសកម្មជនគណបក្សប្រឆាំងនៅខេត្តកំពង់ធំ បានឲ្យដឹងថា សកម្មជនគាំទ្រអតីតបក្សប្រឆាំង ៣រូប ត្រូវបានសមត្ថកិច្ចខេត្តកំពង់ធំ បញ្ជូនទៅសាកសួរនៅស្ថាប័ននានារបស់នគរបាលខេត្តនេះ។
អ្នកស្រី រស់ គឹមសាត ដែលអះអាងថា ត្រូវជាបងស្រីបង្កើតរបស់លោក រស់ គឹមសៀង បានរៀបរាប់ប្រាប់វីអូឌីនៅថ្ងៃនេះថា មេប៉ុស្តិ៍ឃុំស្រយ៉ូវ ស្ថិតក្នុងក្រុងស្ទឹងសែន លោក កង ស៊ន បានហៅប្អូនប្រុសគាត់ និងមនុស្សចំនួន ២នាក់ផ្សេងទៀត ដើម្បីសួរនាំ ប៉ុន្តែ អ្នកស្រីប្រាប់ថា អ្នកស្រីមិនដឹងថា សមត្ថកិច្ចសាកសួរប្អូនប្រុសគាត់អំពីរឿងអ្វីនោះឡើយ។
អ្នកស្រី គឹមសាត បានឱ្យដឹងបន្ថែមថា សមត្ថកិច្ចបានដកហូតទូរស័ព្ទពីប្អូនប្រុសរបស់គាត់ ហើយបញ្ជូនទៅអធិការដ្ឋាននគរបាលក្រុងស្ទឹងសែន និង មនុស្ស២នាក់ទៀត បញ្ជូនទៅអធិការដ្ឋាននគរបាលស្រុកបារាយណ៍ដើម្បីសាកសួរបន្តរហូតដល់ថ្ងៃទី២ ខែកញ្ញានេះ ប៉ុន្តែ អ្នកស្រីប្រាប់ថា អ្នកស្រីពុំបានដឹងថា សមត្ថកិច្ចហៅទៅសាកសួររឿងអ្វីនោះឡើយ។
អ្នកស្រី រស់ គឹមសាត ប្រាប់ថា៖ «គេអត់ផ្តល់ព័ត៌មានមកយើងថាមូលហេតុអ្វីផង ដល់អីចឹង ខ្ញុំអត់ដឹងដែរ។ យើងឆ្ងល់»។
អធិការក្រុងស្ទឹងសែន លោក ញ៉ែម ឈុនលី បានឱ្យដឹងថា លោក រស់ គឹមសៀង កំពុងស្ថិតក្រោមការសាកសួរពីកម្លាំងនគរបាលក្រុងស្ទឹងសែនរហូតមកដល់ថ្ងៃនេះ បន្ទាប់ពីត្រូវបាននាំខ្លួនមកសាកសួរកាលពីថ្ងៃម្សិលមិញនេះ ប៉ុន្តែ លោកពុំអាចបញ្ជាក់អំពីមូលហេតុនៃការហៅទៅសាកសួរនេះទេ។
លោក ញ៉ែម ឈុនលី មានប្រសាសន៍ថា៖ «ឥឡូវ កម្លាំងនគរបាលគេកំពុងសាកសួរ មិនទាន់ដល់ដំណាក់កាលឃាត់គាត់ពីអ្វីទេ កំពុងតែសាកសួរ»។
នៅពេលសាកសួរអំពីមនុស្ស ២នាក់ទៀត លោក ឈុនលី បានរុញឱ្យសាកសួរទៅអធិការស្រុកបារាយណ៍វិញ។
ប៉ុន្តែ វីអូឌីមិនអាចសុំការបំភ្លឺពីអធិការស្រុកបារាយណ៍ លោក សួង ថេន បានទេនៅថ្ងៃនេះ។
ប្រធានគ្រប់គ្រងផ្នែកអង្កេតនៃអង្គការការពារសិទ្ធិមនុស្សលីកាដូ លោក អំ សំអាត ប្រាប់ថា លោកសង្កេតឃើញសកម្មជន ឬអ្នកគាំទ្រអតីតគណបក្សប្រឆាំង ត្រូវបានសមត្ថកិច្ចចាប់ខ្លួនជាបន្តបន្ទាប់ ក្រោយពីអតីតមេដឹកនាំបក្សប្រឆាំង លោក សម រង្ស៊ី បានប្រកាសឲ្យដឹងអំពីគម្រោងវិលត្រឡប់មកកម្ពុជាវិញនៅថ្ងៃទី០៩ ខែវិច្ឆិកាខាងមុខនេះ។
លោក សំអាត បានអំពាវនាវទៅអ្នកនយោបាយយកបញ្ហាដាក់លើតុ ដើម្បីជជែកគ្នារកដំណោះស្រាយ និងគិតពីប្រយោជន៍ជាតិវិញ ជាជាងចាប់ខ្លួនសកម្មជនគាំទ្របក្សនយោបាយបែបនេះ។
លោក អំ សំអាត មានប្រសាសន៍ថា៖ «សង្គមស៊ីវិលយើង អត់ចង់ឲ្យមានទំនាស់ ឬក៏ស្ថានភាពនយោបាយតានតឹងអូសបន្លាយយូរទេ។ វាប៉ះពាល់ វាខាតបង់ប្រជាពលរដ្ឋយើងទេ។ បើអាចទៅរួច អ្នកនយោបាយទាំងអស់ គួរតែប្រើវប្បធម៌ចចារ ឬការចូលតុនិយាយគ្នា ហើយយើងគិតពីផលប្រយោជន៍របស់ជាតិ ផលប្រយោជន៍របស់ប្រជាពលរដ្ឋជាធំ»។
របាយការណ៍របស់លីកាដូ បានបង្ហាញថា អតីតសកម្មជន និងមន្ត្រីគណបក្សសង្គ្រោះជាតិ ១៥៦នាក់ហើយ ត្រូវបានអាជ្ញាធរ ឬតុលាការកោះហៅសាកសួរ ឬចូលបំភ្លឺពាក់ព័ន្ធនឹងការសម្ដែងមតិ និងការជួបជុំរបស់ពួកគេ ស្របពេលដែលសកម្មជនបក្សប្រឆាំង ១៩នាក់ ត្រូវបានសមត្ថកិច្ចចាប់ខ្លួន និងដាក់ឃុំ គិតត្រឹមចុងខែសីហាក្នុងឆ្នាំ២០១៩នេះ៕
