ប្រធានគណៈមេធាវីអាណត្តិទី១១ ត្រូវបានតែងតាំងជាផ្លូវការកាលពីម្សិលមិញ បន្ទាប់ពីលោកធ្លាប់ជាប់ម្តងកាលពីជាង១០ឆ្នាំមុន តែត្រូវដៃគូប្រជែងជំទាស់មិនព្រមប្រគល់ដំណែងឲ្យ។
លោកមេធាវី សួន វិសាល ដែលបច្ចុប្បន្នជាសមាជិកក្រុមប្រឹក្សាអ្នកច្បាប់ នៃទីស្តីការគណៈរដ្ឋមន្ត្រី ជាប្រធានក្រុមហ៊ុនមេធាវី និងជាសាស្រ្តាចារ្យច្បាប់ផងនោះ ត្រូវបានចូលកាន់តំណែងផ្លូវការជាប្រធានគណៈមេធាវីកម្ពុជាកាលពីម្សិលមិញ បន្ទាប់ពីលោកត្រូវបានមេធាវីភាគច្រើនបោះឆ្នោតជ្រើសរើសជាប្រធានកាលពីថ្ងៃទី១៦ តុលា ឆ្នាំ២០១៦កន្លងទៅ។ លោកត្រូវបានជ្រើសរើសជាប្រធានគណៈមេធាវីកម្ពុជាសម្រាប់អាណត្តិទី១១ បន្ទាប់ពីលោក ប៊ុន ហ៊ុន ដែលផុតអាណត្តិ។
គួររំលឹកផងដែរថា លោកមេធាវី សួន វិសាល ធ្លាប់ត្រូវបានសមាជិកគណៈមេធាវីបោះឆ្នោតឲ្យជាប់ជាប្រធានសម្រាប់អាណត្តិទី៥ ម្តងរួចមកហើយកាលពីឆ្នាំ២០០៤ តែតំណែងនេះត្រូវបានមេធាវីដែលប្រកួតប្រជែងគឺលោកមេធាវី គី តិច ដែលបច្ចុប្បន្នជាមេធាវីរាជរដ្ឋាភិបាល និងជាអនុប្រធានក្រុមប្រឹក្សាអ្នកច្បាប់នៃទីស្តីការគណៈរដ្ឋមន្ត្រី ប្តឹងតវ៉ាទៅស្ថាប័នតុលាការដោយមិនព្រមប្រគល់តំណែងនេះទៅឲ្យលោក សួន វិសាល ទេ។ ពេលនោះលោកគី តិចត្រូវបានកាន់តំណែងជាប្រធានគណៈមេធាវីនេះចំនួនពីរអាណ្តតិជាប់គ្នាដោយពោពេញដោយភាពចម្រូងចម្រាស់៕