នាយករដ្ឋមន្ត្រីកម្ពុជាស្នើឲ្យប្រធានាធិបតីនៃប្រទេសស្វីសបង្កើនការវិនិយោគជាមួយកម្ពុជាឲ្យបានលើសពីទំហំ៣០លានដុល្លារ ជាទំហំពាណិជ្ជរបស់ប្រទេសទាំងពីរបច្ចុប្បន្ននិងស្នើឲ្យមានការជួយលើវិស័យមួយចំនួនទៀតដែលជាផ្នែកនៃកិច្ចសហប្រតិបត្តិការនៃប្រទេសទាំងពីរ។
ក្នុងឱកាសនៃការចូលរួមវេទិកាសេដ្ឋកិច្ចពិភពលោកនៅប្រទេសស្វីស លោកនាយករដ្ឋមន្ត្រី ហ៊ុន សែន ក៏មានការណាត់ជួបជាទ្វេភាគីជាមួយប្រធានាធិបតីស្វីសលោកស្រី Doris Leuthard កាលពីម្សិលមិញ។ ក្នុងជំនួបនោះ លោកនាយរដ្ឋមន្ត្រីបានស្នើអោយពង្រីកទំហំពាណិជ្ជកម្មនៃប្រទេសទាំងពីរដែលសព្វថ្ងៃមានប្រមាណជាង៣០លានដុល្លា អោយមានទំហំធំឡើង។ លោកនាយករដ្ឋមន្ត្រី ក៏បានស្នើឲ្យជួយបន្តបណ្តុះបណ្តាលធនធានមនុស្សនៅកម្ពុជា។
លោកនាយករដ្ឋមន្រ្តីអរគុណរដ្ឋាភិបាលស្វីសដែលបានជួយនិងផ្តល់ជំនួយដល់កម្ពុជាកន្លងមក រួមទាំងជំនួយផ្នែកដោះមីន សុខាភិបាល និងជំនួយផ្នែកតុលាការកាត់ក្តីខ្មែរក្រហម។
នៅក្នុងកិច្ចពិភាក្សាទ្វេភាគីនោះ ក្នុងនាមព្រះមហាក្សត្រកម្ពុជា លោក ហ៊ុន សែន បានអញ្ជើញ លោក ស្រីប្រធានាធិបតីស្វីសមកទស្សនៈកិច្ចកម្ពុជា នៅពេលសមរម្យមួយនិងស្នើអោយលោកស្រីជួយជំរុញអ្នកវិនិយោគទុនស្វីសមកចូលរួមនៅក្នុងវេទិកាសេដ្ឋកិច្ចពិភពលោកស្តីពីអាស៊ាន ដែលនឹងធ្វើនៅកម្ពុជានៅខែ ឧសភា ឆ្នាំ២០១៧ ខាងមុខនេះផងដែរ៕
