ប្រធានគណបក្សសង្រ្គោះជាតិ លោក សម រង្ស៊ី ដែលកំពុងនិរទេសខ្លួននៅក្រៅប្រទេសគេចពីការចាប់ខ្លួន បានលើកឡើងថាប្រទេសកម្ពុជានឹងប្រឈមការផ្តាច់ជំនួយ នៅក្នុងលក្ខខណ្ឌមួយដែលលោកថាប្រសិនបើ”មេដឹកនាំមិនព្រមកែខ្លួន”។
លោក សម រង្ស៊ី បានសរសេរបែបនេះនៅលើទំព័រហ្វេសប៊ុករបស់លោកនៅថ្ងៃទី២០ខែកុម្ភៈនេះថាមេដឹកនាំផ្តាច់ការបានយកប្រជាជនជា”ចំណាប់ខ្មាំង”ក្នុងការទទួលជំនួយពីក្រៅប្រទេស។
លោកមានប្រសាសន៍ថា៖ “មេដឹកនាំផ្តាច់ការណាក៏ធ្វើជាមិនយល់ថាសហគមន៍អន្តរជាតិម្ចាស់ជំនួយ គេមានបំណងល្អទេ ក្នុងការជំរុញប្រទេសក្រីក្រដែលទទួលជំនួយពីគេ ឲ្យគោរពសិទ្ធិមនុស្សនិងលទ្ធិប្រជាធិបតេយ្យដែលនឹងនាំមកអភិបាលកិច្ចល្អ”។
លោកបន្ថែមថា៖ “ប្រទេសម្ចាស់ជំនួយដែលជាប្រទេសប្រជាធិបតេយ្យ គេអត់មានផលប្រយោជន៍អ្វីទេ ក្រៅពីចង់ឃើញ ប្រទេសដែលទទួលជំនួយពីគេ បានស្គាល់នូវលទ្ធិប្រជាធិបតេយ្យពិតប្រាកដដូចគេដែរ ហើយថ្ងៃណាមួយមិនចាំបាច់សុំជំនួយពីគេទៀត”។
មេដឹកនាំបក្សប្រឆាំងរូបនោះបានលើកយកករណីប្រទេសកម្ពុជា ដោយថាកម្ពុជាមានជម្រើសពីរគឺជម្រើស។ លោកបញ្ជាក់ថា៖ “ជម្រើសទី១៖ មេដឹកនាំមិនព្រមកែខ្លួន ពេលនោះប្រទេសនឹងបាត់ជំនួយ។ ជម្រើសទី២៖ មេដឹកនាំចេះកែខ្លួនដោយចាប់ផ្តើមអនុវត្តលទ្ធិប្រជាធិបតេយ្យពិតប្រាកដ ពេលនោះជំនួយនៅតែបន្ត ហើយមានតែកើនឡើង”។
លោក សម រង្ស៊ី មានប្រសាសន៍ថាជម្រើសទី១មិនល្អសម្រាប់កម្ពុជានោះទេ។ លោកបញ្ជាក់ថា៖ “គ្មានព្រហ្មលិខិតណាតម្រូវឲ្យយើងយកជម្រើសទី១ទេ ដែលធ្វើឲ្យយើងបាត់បង់ទាំងសេរីភាព ទាំងជំនួយអន្តរជាតិ។ ផ្ទុយទៅវិញ យើងត្រូវជំរុញឲ្យប្រទេសយើងយកជម្រើសទី២វិញ ដែលធ្វើឲ្យយើងទទួលបានទាំងសេរីភាព ទាំងជំនួយអន្តរជាតិ”។
លោក សម រង្ស៊ី បានសរសេរនៅលើហ្វេសប៊ុកបែបនេះ ដោយភ្ជាប់ជាមួយរូបរបស់ប្រធានាធិបតីអាមេរិក លោក បារ៉ាក់ អូបាម៉ា។ ការលើកឡើងរបស់លោក សម រង្ស៊ី ធ្វើឡើងបន្ទាប់ពីលោកនាយករដ្ឋមន្រ្តី ហ៊ុន សែន ទើបត្រឡប់មកពីចូលរួមកិច្ចប្រជុំកំពូលអាមេរិក-អាស៊ាន កាលពីថ្ងៃទី១៨ខែកុម្ភៈ។
កាលពីកិច្ចប្រជុំកន្លងទៅ លោក បារ៉ាក់ អូបាម៉ា ឲ្យដឹងថាលោកបានសង្កត់ធ្ងន់ទៅមេដឹកនាំអាស៊ានទាំង១០ប្រទេសថាអ្នកនយោបាយបក្សប្រឆាំងមិនគួរត្រូវដាក់ពន្ធនាគារដោយសារការបញ្ចេញមតិរបស់ពួកគេនោះទេ។ លោកមានប្រសាសន៍ថា៖ “ខ្ញុំបានបញ្ជាក់ច្បាប់ថាសហរដ្ឋអាមេរិកនឹងបន្តធ្វើការជាមួយប្រទេសជាសមាជិកអាស៊ានដែលកំពុងធ្វើការលើកតម្កើងនីតិរដ្ឋ អភិបាលកិច្ចល្អ ស្ថាប័នគនេយ្យភាពនិងសិទ្ធិមនុស្សជាសាកលសម្រាប់ប្រជាជនទាំងអស់”។ លោកបញ្ជាក់បន្ថែមថា៖ “គ្មាននរណាម្នាក់ រួមទាំងអ្នកមកពីបក្សនយោបាយប្រឆាំងគួរត្រូវបានឃុំខ្លួននិងដាក់ពន្ធនាគារដោយសារការបញ្ចេញមតិធម្មតារបស់ពួកគេ”។
លោកបន្តថាសហរដ្ឋអាមេរិកនឹងបន្តការគាំទ្រប្រជាពលរដ្ឋ សង្គមស៊ីវិលនិងការពារសេរីភាពនៃការបញ្ចេញមតិ ប្រមូលផ្តុំនិងសេរីភាពសារព័ត៌មាន។
មុននឹងកិច្ចប្រជុំកំពូលនេះ សមាជិកព្រឹទ្ធសភាអាមេរិក៧រូបមកពីគណបក្សប្រជាធិបតេយ្យ បានសរសេរលិខិតមួយច្បាប់ចុះថ្ងៃទី១១ខែកុម្ភៈ ទៅនាយករដ្ឋមន្រ្តីខ្មែរ ដោយអំពាវនាវឲ្យអនុញ្ញាតប្រធានបក្សប្រឆាំង លោក សម រង្ស៊ី វិលចូលស្រុកវិញ ដោះលែងសកម្មជនសិទ្ធិមនុស្សនិងបង្ហាញក្តីបារម្ភលើបញ្ហាមួយចំនួនទៀតលើបញ្ហាសិទ្ធិមនុស្សនិងលទ្ធិប្រជាធិបតេយ្យ។
លោក ហ៊ុន សែន បានឲ្យដឹងថាលោកបញ្ជាឲ្យមន្រ្តីបញ្ជូនលិខិតនោះទៅវិញ ដោយថាលិខិតនោះមានអត្ថន័យ”ជេរ”រូបលោក។
វីអូឌីមិនអាចទាក់ទងអ្នកនាំពាក្យគណបក្សប្រជាជនកម្ពុជា ដើម្បីសុំការឆ្លើយតបភ្លាមៗបាននៅឡើយទេ៕
