រដ្ឋាភិបាលវៀតណាមបានដាក់ពាក្យប្តឹងចិនទៅកាន់ប្រធានអង្គការសហប្រជាជាតិ កាលពីថ្ងៃសុក្រម្សិលមិញដោយបញ្ជាក់ថា ខ្លួនមានការបារម្ភជាខ្លាំង ព្រោះទីក្រុងប៉េកាំង បានដាក់ពង្រាយប្រព័ន្ធមីស៊ីលការពារអាកាសនៅក្នុងតំបន់មានជម្លោះនៅសមុទ្រ ចិនខាងត្បូង។
រដ្ឋមន្ត្រីក្រសួងការបរទេសវៀតណាមលោក Le Hai Binh ថ្លែងថា ជាការរំលោភធ្ងន់ធ្ងរលើដែនអធិបតេយ្យភាពរបស់ខ្លួននៅលើកោះប៉ារ៉ាសែល ដូចជាការគំរាមកំហែងដល់សន្តិភាព និងស្ថិរភាពក្នុងតំបន់ក៏ដូចជា សន្តិសុខ សុវត្ថិភាព និង សេរីភាពក្នុងការធ្វើនាវាចរណ៍ និង ការហោះហើរ។ នេះបើតាមសារព័ត៌មានChannel News Asia។
សេចក្តីប្រកាសព័ត៌មានរបស់រដ្ឋាភិបាលវៀតណាមបញ្ជាក់ថា សេចក្តីព្រួយបារម្ភនេះ គឺមិនបានបញ្ជូនទៅស្ថានទូតចិនប្រចាំទីក្រុងហាណូយទេ គឺបញ្ជូនទៅកាន់អគ្គលេខាធិការអង្កការសហប្រជាជាតិតែម្តង ដើម្បីតវ៉ាលើសកម្មភាពរបស់ទីក្រុងប៉េកាំង។
មន្ត្រីរបស់អាមេរិក និង តៃវ៉ាន់ថ្លែងកាលពីថ្ងៃពុធថា ការរៀបចំប្រព័ន្ធមីស៊ីល គឺជាការរំលោភបំពាន ខណៈវៀតណាម និង តៃវ៉ាន់ក៏អះអាងថា ខ្លួនមានចំណែកនៅលើកោះប៉ារ៉ាសែលនោះដែរ។
កាលពីពេលប្រជុំមេដឹកនាំអាស៊ាននៅអាមេរិក កាលពីដើមសប្តាហ៍នេះ នាយករដ្ឋមន្ត្រីវៀតណាម លោក Nguyen Tan Dung ស្នើឲ្យលោកអូបាម៉ា មានចំណាត់ការឲ្យកាន់តែមានប្រសិទ្ធភាពក្នុងការប្រឆាំង សកម្មភាពរបស់ចិនក្នុងការកែច្នៃ និង អភិវឌ្ឍន៍កោះនៅសមុទ្រ ចិនខាងត្បូង។
