រដ្ឋសភាកម្ពុជាបានអនុម័តច្បាប់ស្តីពីគណបក្សនយោបាយដែលរងការរិះគន់និងចម្រូងចម្រាសដោយគ្មានវត្តមានបក្សប្រឆាំងនៅព្រឹកនេះ។
ការកែច្បាប់ស្តីពីគណបក្សនយោបាយនេះ ត្រូវបានគាទ្រដោយសមាជិកសភាបក្សប្រជាជន៦៦លើ៦៦សំឡេង ដែលចូលរួមប្រជុំ។
អ្នកនាំពាក្យរដ្ឋសភាលោក ឡេង ប៉េងឡុង មានប្រសាសន៍ថា ច្បាប់នេះបានចែងជាការប្រញាប់ ហើយរដ្ឋសភានឹងបញ្ជូនទៅព្រឹទ្ធសភានៅថ្ងៃដដែលនេះផងដែរ។ ចំពោះអវត្តមានរបស់បក្សប្រឆាំងក្នុងការប្រជុំអនុម័តនេះលោក ឡេង ប៉េងឡុង បានចាត់ទុកថាគណបក្សនេះគ្មានចេតនាក្នុងការសន្ទនាជាមួយបក្សកាន់អំណាចនិងបង្កើតព្រឹត្តិការណ៍ដើម្បីចំណេញនយោបាយរបស់ខ្លួន។
គណបក្សសង្គ្រោះជាតិបានចេញសេចក្តីថ្លែងការមួយកាលពីម្សិលមិញដោយបានចាត់ទុកថាច្បាប់នេះ នឹងបង្កឲ្យមានការបែកបាក់ឯកភាពជាតិ ផ្ទុយពីគោលការណ៍ នៃលិទ្ធិប្រជាធិបតេយ្យ សេរីពហុបក្ស ខុសពីឆន្ទះរាស្ត្រ និងក្នុងគោលបំណងបំផ្លាញគណបក្សគូប្រជែងជាមួយបក្សកាន់អំណាច។
ច្បាប់ដែលសភាអនុម័តហើយនោះ បានបើកផ្លូវឲ្យក្រសួងមហាផ្ទៃនិងតុលាការ អាចផ្អាកឬរំលាយគណបក្សនយោបាយណាមួយចោលក៏បាន ប្រសិនបើក្រសួងរកឃើញថាគណបក្សនយោបាយនោះ បំពានទៅលើច្បាប់ថ្មីនេះ។
កាលពីពេលថ្មីៗនេះសមាជិកសភាអាមេរិក និងសមាជិកសភាអឺរ៉ុបបានរិះគន់ទៅលើច្បាប់នេះថា នឹងអាចនាំកម្ពុជាទៅរកការគ្រប់គ្រងតែមួយបក្សទៅថ្ងៃអនាគត ដោយលើកឡើងថាច្បាប់នេះនឹងបើកសិទ្ធិឲ្យរដ្ឋាភិបាល មានអំណាចកាន់តែខ្លាំងឡើងក្នុងការរារាំងបក្សនយោបាយដទៃដែលជាគូរប្រជែងខ្លួនមិនឲ្យធ្វើនយោបាយបាន ហើយទៅថ្ងៃមុខវាជាគ្រោះថ្នាក់មួយនៃដំណើការលិទ្ធិប្រជាធិបតេយ្យនៅកម្ពុជា៕
