មេធាវីមួយរូបដែលធ្លាប់ការពារក្តីឲ្យបក្សប្រឆាំង បានដាក់ពាក្យស្នើសុំការពារក្តីឲ្យ លោក គឹម សុខ នៅដើមសប្តាហ៍នេះ ក្រោយពីអ្នកវិភាគរូបនេះស្នើសុំឲ្យជួយការពារតាមផ្លូវច្បាប់។
អ្នកឃ្លាំមើលនិងអត្ថាធិប្បាយបញ្ហាសង្គម លោក គឹម សុខ ដែលគេស្គាល់តាមរយៈការរិះគន់ចំណុចខ្វះខាតរដ្ឋាភិបាល ត្រូវបានតុលាការឃុំខ្លួននៅពន្ធនាគារព្រៃស កាលពីថ្ងៃសុក្រ ទី១៧ កុម្ភៈ បន្ទាប់ពីលោកចូលបំភ្លឺតាមបណ្តឹងរបស់មេធាវីការពារក្តីឲ្យលោកនាយករដ្ឋមន្ត្រី ហ៊ុន សែន។
មេធាវី ជួង ជូងី ប្រាប់VODថា សាលាដំបូងរាជធានីភ្នំពេញ បានទទួលយកសំណើរបស់លោក ដែលស្នើសុំការពារក្តីឲ្យលោក គឹម សុខ នៅព្រឹកថ្ងៃចន្ទនេះ។ លោកបន្តថា នៅរសៀលថ្ងៃនេះលោកនឹងទៅជួបលោក គឹម សុខ នៅពន្ធនាគារ ដើម្បីជជែកគ្នាពីសំណុំរឿងដែលមេធាវីរដ្ឋាភិបាលប្តឹងអ្នកវិភាគរូបនោះ។ លោកថា ដំណាក់កាលដំបូង ត្រូវស្នើសុំឲ្យកូនក្តីលោកបាននៅក្រៅឃុំបណ្តោះអាសន្ន ដោយថាកូនក្តីមានសិទ្ធិការពារខ្លួនតាមផ្លូវច្បាប់។ លោកនិយាយថា៖ «ដោះលែងនៅក្រៅឃុំសិន ព្រោះវាជាសិទ្ធិសេរីភាពរបស់មនុស្សគ្រប់រូបត្រូវបានការពារដោយច្បាប់ ការឃុំខ្លួនប៉ះពាល់សិទ្ធិមូលដ្ឋានរបស់គាត់»។
កាលពីថ្ងៃទី១៦ កុម្ភៈនេះ លោក គឹម សុខ បានដាក់ពាក្យសុំពន្យារពេលចូលទៅបំភ្លឺនៅតុលាការតាមដីកាបង្គាប់ ដោយថាមិនទាន់មានមេធាវីការពារក្តី ប៉ុន្តែតុលាការច្រានចោលសំណើនោះ។
កាលពីពេលថ្មីៗនេះ លោក គី តិច មេធាវីការពារក្តីឲ្យលោកនាយករដ្ឋមន្ត្រី ហ៊ុន សែន បានប្តឹងលោក គឹម សុខ ពីរសំណុំរឿង។ សំណុំរឿងទីមួយ ប្តឹងលោក គឹម សុខ ថាបានអត្ថាធិប្បាយចោទប្រកាន់គណបក្សប្រជាជនកម្ពុជាថា ជាអ្នកសម្លាប់លោកបណ្ឌិត កែម ឡី ដោយមិនមានមូលដ្ឋាន និងទាមទារសំណងជំងឺចិត្ត៥០ម៉ឺនដុល្លារ។ បណ្តឹងមួយករណីទៀតថា លោក គឹម សុខ បាន ចោទ រដ្ឋាភិបាលកម្ពុជា ថា ជាអ្នករៀបចំប្រព័ន្ធមួយ ដើម្បីសម្លាប់មនុស្ស ហើយរកមុខឃាតកមិនឃើញ និងទារប្រាក់សំណង១០លានរៀលផងដែរ។
បើតាម ព្រះសង្ឃ ប៊ុត ប៊ុនតិញ តុលាការបានចោទប្រកាន់លោក គឹម សុខ ចំនួនពីរបទល្មើស រួមមាន បទ «ញុះញង់ឱ្យប្រព្រឹត្តិបទឧក្រិដ្ឋជាអាទិ៍ និងបរិហាកេរ្តិ៍ ជាសាធារណៈ» ដោយបញ្ជូនទៅឃុំខ្លួនបណ្តោះអាសន្ននៅពន្ធនាគារ បន្ទាប់ពីតុលាការសាកសួរ៕