បុរសជនជាតិវៀតណាម​ជឿថាប្អូនស្រីរបស់ខ្លួនសម្លាប់បងលោក គីម ជុងអ៊ុន​

បុរសជនជាតិវៀតណាមម្នាក់ថ្លែង កាលពីថ្ងៃអាទិត្យម្សិលមិញថា លោកជឿជាក់ថា ប្អូនស្រីរបស់លោក ពិតជាមនុស្សម្នាក់ក្នុងចំណោមជនសង្ស័យផ្សេងទៀត ដែល​អាជ្ញាធរម៉ាឡេស៊ីឃាត់ខ្លួន ពាក់ព័ន្ធករណីឃាត់កម្មសម្លាប់បងប្រុសលោក គីម ជុងអ៊ុន មេដឹកនាំកូរ៉េខាងជើង។​

លោក គីម ជុងណាម ត្រូវបាន គេសម្លាប់នៅព្រលានយន្តហោះអន្តរជាតិ កូឡាឡាំពូ ដែលគេជឿថា ធ្វើឡើងដោយសកម្មភាពដាក់ថ្នាំបំពុលយ៉ាងឆាប់រហ័ស។ នគរបាលម៉ាឡេស៊ីបញ្ជាក់ថា ក្នុងចំណោមអ្នកដែលត្រូវឃាត់ខ្លួននោះគឺម្នាក់ជាស្រ្តី​ជនជាតិវៀតណាម។​

ចំណែកអាជ្ញាធរវៀតណាម​បញ្ជាក់ថា ពេលនេះ ពួកគេកំពុងតែបើកការស៊ើបអង្កេត និង សហការយ៉ាងជិតស្និទ្ធជាមួយអាជ្ញាធរម៉ាឡេស៊ី។​

លោក Joseph Doan បញ្ជាក់ថា ប្អូនស្រីរបស់លោក ឈ្មោះ  Doan Thi ដែលកើតនៅឆ្នាំ​១៩៨៨ នៅក្នុងខេត្ត​ Nam Dinh នៅភាគអាគ្នេយ៍នៃខេត្តទីក្រុងហាណូយពិតជា មានលក្ខណៈដូចការបញ្ចាក់របស់នគរបាលម៉ាឡេស៊ី៕