ចលនាសង្គ្រោះជាតិដែលដឹកនាំដោយលោក សម រង្ស៊ី នៅក្រៅប្រទេសចាប់ផ្តើមប្រឆាំងផលិតផល របស់ក្រុមគ្រួសារលោកនាយករដ្ឋមន្ត្រីហ៊ុន សែន ករណីនេះអ្នកឃ្លាំមើលវិភាគថា មានប្រសិទ្ធិភាព ចំណែកបក្សកាន់អំណាចថា មិនទទួលផលទេ។
មេដឹកនាំចលនាសង្គ្រោះជាតិ លោក សម រង្ស៊ី អំពាវនាវឲ្យប្រជាពលរដ្ឋឈប់ទិញទឹកសុទ្ធម៉ាក វីតាល់ (Vital) ដែលថា ជាផលិតផលក្រុមហ៊ុនរបស់លោកស្រី ហ៊ុន ម៉ាណា កូនស្រីលោក ហ៊ុន សែន។
ចលនានេះចាប់ផ្ដើម ធ្វើយុទ្ធនាការឃោសនាជាលើកទីមួយ និងមានរយៈពេល២សប្តាហ៍ ចាប់ពីថ្ងៃទី១៩ កុម្ភៈ ដល់ថ្ងៃទី៤ ខែមិនា ឆ្នាំ២០១៨ ដើម្បីអំពាវនាវអោយប្រជាពលរដ្ឋធ្វើពហិការឈប់ទិញទឹកសុទ្ធម៉ាក វីតាល់ (Vital)។
ប្រធានក្រុមអ្នកវិភាគវ័យក្មេងលោក ហង្ស វិទូ វិភាគថា ចលនាសង្គ្រោះជាតិដែលដឹកនាំដោយលោក សម រង្ស៊ី នៅក្រៅប្រទេស អាចធ្វើឲ្យមហាជនមានការគាំទ្រកាន់តែខ្លាំង ដោយថាបើចលនានោះធ្វើឲ្យបានជាប់លាប់ និងអហិង្សា។
លោកវិភាគថា«[អតីត] គណបក្សប្រឆាំងគាត់តែងតែប្រើវិធីសាស្ត្រត្រជាក់ ដើម្បីដោះស្រាយបញ្ហា ដូច្នេះខ្ញុំយល់ឃើញថា ទង្វើនេះល្អហើយ ហើយគួរតែធ្វើឲ្យជាប់លាប់ ហើយធ្វើដកថយ យូនិងឆាប់ នឹងបានផល កុំធ្វើបាត់… គឺមិនអាចជោគជ័យបានទេ ទីពីរគណបក្សប្រឆាំងក៏ត្រូវតែ ប្រើវិធីសាស្ត្រកាទូត មួយទៀតគឺកម្រិតអន្តរជាតិ ក៏ត្រូវតែមានការទាក់ទងសកម្មជាមួយបណ្តាលប្រទេសធំៗ ដែលគាត់មានការគោរពលទ្ធិប្រជាធិប្រជាធិបតេយ្យច្បាស់លាស់ ដើម្បីឲ្យគេជួយគាំទ្រ ខ្ញុំយល់ថានឹងបានផល»។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជាលោក សន ជ័យ មានប្រសាសន៍ថា អ្នកនយោបាយ តែងតែលើកពីចំណុចខ្វះខាតរបស់ដៃគូប្រកួតរបស់ខ្លួន ដោយថាដើម្បីទទួលបានប្រជាប្រិយ និងទាក់ទាញអ្នកគាំទ្រ។
លោកវិភាគថា«គូប្រជែងនយោបាយ គេដើម្បីយកព្រាបលើគ្នា ឬមួយក៏គេត្រូវប្រជែងគ្នា គេយករឿងសេដ្ឋកិច្ចមកជាវិធានការ វាយបកគ្នាទៅវិញទៅមក វាអាចនឹងមានអ្នកដែលគេយល់ដូចលោក សម រង្ស៊ី ចឹងគេអាចពិចារណា ឬក៏អាចសម្រេចចិត្តទៅតាមការអំពាវនាវរបស់លោក សម រង្ស៊ី»។
យ៉ាងណាក៏ដោយ អ្នកនាំពាក្យគណបក្សប្រជាជនកម្ពុជា លោក សុខ ឥសាន មិនចាប់អារម្មណ៍ការអំពាវនាវរបស់មេដឹកនាំចលនាសង្គ្រោះជាតិនោះទេ ដោយលោកចំអកទៅលោក សម រង្ស៊ី ថា ការអំពាវនាវនោះមិនមានប្រសិទ្ធិភាពនោះឡើយ។
លោកចំអកដូចនេះថា«រឿងនេះវាមិនមែនជារឿងចំឡែកអីទេ ដែលទណ្ឌិតសម រង្ស៊ី កាលពីប៉ុន្មានឆ្នាំមុន អំពាវនាវមិនឲ្យប្រជាពលរដ្ឋប្រើប្រាស់ទំនិញរបស់វៀតណាម កាលពីអំពាវនាវសួរថា ប្រជាពលរដ្ឋណា ដែលតាមការអូសទាញរបស់គាត់ទេ វាអត់ទេ ឥឡូវយកមេរៀនដដែល យកមកអនុវត្តទៀត ខ្ញុំយល់ថា វាអត់មានប្រយោជន៍អីទាំងអស់»។
លោក សម រង្ស៊ី អះអាងថា ចលនាសង្គ្រោះជាតិផ្ដួចផ្ដើមដោយរូបលោកផ្ទាល់នោះ នឹងធ្វើសកម្មភាពឈានទៅដាក់សម្ពាធដៃគូប្រកួត ឲ្យពិចារណាបើកចំហប្រជាធិបតេយ្យឡើងវិញ ក្រោយពីគណបក្សប្រឆាំងរបស់លោក ត្រូវបានរំលាយកាលពីពាក់កណ្តាល ខែវិច្ឆិកា ឆ្នាំមុន ហើយថ្នាក់ដឹកនាំ ១១៨រូបរបស់បក្សប្រឆាំងមួយនេះ ក៏ត្រូវបានដាក់ឲ្យស្ថិតក្រោមការហាមឃាត់មិនឲ្យធ្វើនយោបាយរយៈពេល ៥ឆ្នាំផងដែរ។
ប៉ុន្តែក្រុមចលនាសង្គ្រោះជាតិដែលដឹកនាំដោយលោក សម រង្ស៊ី នោះ ត្រូវបានរដ្ឋាភិបាលកម្ពុជាចាត់ទុកថា ក្រុមឧទ្ទាមក្រៅច្បាប់។ មិនតែប៉ុណ្ណោះ ថ្នាក់ដឹកនាំនៃចលនានេះក៏ត្រូវបានក្រសួងមហាផ្ទៃប្តឹងឲ្យតុលាការកម្ពុជាចាត់ការទៅតាមផ្លូវច្បាប់ថែមទៀត៕
