រដ្ឋាភិបាលបានប្រកាសថា កម្មករនិយោជិតនឹងត្រូវឈប់សម្រាកចំនួន ៤ថ្ងៃ ដើម្បីបានទៅលេងស្រុកកំណើត និងដើរលេងកម្សាន្តនៅថ្ងៃបុណ្យចូលឆ្នាំខ្មែរខាងមុខនេះ។
ក្នុងសេចក្តីជូនដំណឹងកាលពីថ្ងៃម្សិលមិញនេះ ក្រសួងការងារ និងបណ្តុះបណ្តាលវិជ្ជាជីវៈ ប្រាប់ទៅម្ចាស់សហគ្រាស គ្រឹះស្ថានទាំងអស់ត្រូវអនុញ្ញាតឲ្យកម្មករនយោជិតរបស់ខ្លួនឈប់សម្រាកចាប់ពីថ្ងៃទី១៤ ដល់ថ្ងៃទី១៧ ខែមេសា ដោយលើកពេល ១ថ្ងៃ គឺថ្ងៃទី១៥ ព្រោះថ្ងៃនោះចំថ្ងៃអាទិត្យ។
ក្រសួងបញ្ជាក់ថា ប្រសិនបើក្នុងករណីចាំបាច់បំផុតដែលសហគ្រាស ឬគ្រឹះស្ថានទាំងនោះ មិនអាចបញ្ឈប់ប្រតិបត្តិការការងាររបស់ខ្លួនបានក្នុងថ្ងៃបុណ្យចូលឆ្នាំខ្មែរខាងមុខនេះទេ ម្ចាស់សហគ្រាសទាំងអស់ត្រូវសម្របសម្រួលជាមួយកម្មករនិយោជិតឲ្យមានការស្ម័ត្រចិត្ត ហើយត្រូវបែងចែកឲ្យមានពេលវេលា និងថ្ងៃឈប់សម្រាកថ្ងៃបុណ្យបានសមរម្យ និងត្រូវទទួលបានប្រាក់បំណាច់បន្ថែមស្មើនឹងប្រាក់ឈ្នួលថ្ងៃធ្វើការធម្មតា៕