ទីភ្នាក់ងារព័ត៌មានអន្តរជាតិបានចុះផ្សាយថា អាមេរិក និងកូរ៉េខាងត្បូង បានឯកភាពគ្នាចាប់ផ្ដើមសមយុទ្ធយោធាឡើងវិញនៅខែក្រោយនេះ ដែលនេះគឺជាសេចក្ដីមួយដែលត្រូវបានគេរំពឹងទុក បើទោះបីជាប្រធានាធិបតី ដូណាល់ ត្រាំ មានផែនការជួបជាមួយមេដឹកនាំកូរ៉េខាងជើង លោក គីម ជុងអ៊ុន ក៏ដោយ។
ទីភ្នាក់ងារព័ត៌មាន Reuters បានចុះផ្សាយថា ក្រុងសេអ៊ូល និងក្រុងវ៉ាស៊ីងតោន បាននិយាយកាលពីខែមករាថា ពួកគេនឹងពន្យារពេលសមយុទ្ធប្រចាំឆ្នាំ រហូតទាល់តែក្រោយកម្មវិធីប្រកួតកីឡាអូឡាំពិក និងប៉ារ៉ាអូឡាំពិកនៅកូរ៉េខាងត្បូង ដោយជួយបង្កើនស្ថានភាពល្អសម្រាប់ការចាប់ផ្ដើមជជែកគ្នាឡើងវិញរវាងកូរ៉េខាងត្បូង និងខាងជើង។
ដោយថាបានដកស្រង់សម្ដីសេចក្ដីប្រកាសព័ត៌មានរបស់មន្ទីរប៉ង់តាហ្គូនអាមេរិកនោះ ទីភ្នាក់ងារព័ត៌មាន Reuters បានចុះផ្សាយបន្ថែមថា សមយុទ្ធយោធានោះ ត្រូវបានគេរំពឹងថានឹងចាប់ផ្ដើមនៅថ្ងៃទី០១ ខែមេសាខាងមុខ ហើយវាមានទំហំប្រហាក់ប្រហែលទៅនឹងសមយុទ្ធយោធាកាលពីឆ្នាំមុនៗផងដែរ។
បើតាមសេចក្ដីរាយការណ៍របស់ Reuters នេះ មន្ទីរប៉ង់តាកោណអាមេរិកក៏បានជូនដំណឹងអំពីសមយុទ្ធយោធានេះទៅកូរ៉េខាងជើងផងដែរតាមរយៈបញ្ជាការដ្ឋានអង្គការសហប្រជាជាតិ៕
