សាលាដំបូងរាជធានីភ្នំពេញបានចេញសេចក្តីថ្លែងការណ៍មួយដោយបញ្ជាក់តាមចម្លើយរបស់កញ្ញា ខុម ចាន់តារាទី ហៅស្រីមុំថាលោក កឹម សុខា អនុប្រធានគណបក្សសង្រ្គោះជាតិ បានណែនាំនាងមិនឲ្យនិយាយការពិតពីទំនាក់ទំនងស្នេហាដែលត្រូវគេទម្លាយតាមខ្សែអាត់សំឡេង។
កាលពីថ្ងៃអង្គារ ព្រះរាជអាជ្ញារងអមសាលាដំបូងរាជធានី លោក សៀង សុខ បានសាកសួរកញ្ញាស្រីមុំអស់រយៈពេលជាង៤ម៉ោង ពីដំណើររឿងរបាយការណ៍របស់សមត្ថកិច្ចនៃនាយកដ្ឋានប្រឆាំងភេរវកម្មនិងឧក្រិដ្ឋកម្មឆ្លងដែន ដែលថាមានករណីផ្ដល់សក្ខីកម្មក្លែងនិងមានអំពើពេស្យាចារ។ កន្លងទៅ ស្រីមុំបានបដិសេធទាំងស្រុងលើសំឡេងបែកធ្លាយថាមិនមែនជាសំឡេងរបស់នាង ដែលគេអះអាងថាសន្ទនាជាមួយមួយលោក កឹម សុខា នោះទេ។
នៅក្នុងសេចក្តីថ្លែងការណ៍មួយចេញផ្សាយកាលពីថ្ងៃអង្គារ អយ្យការនៃសាលាដំបូងបញ្ជាក់ថាសំណុំរឿងនេះមានការចាប់អារម្មណ៍ពីសាធារណជនច្រើននិងមានពាក្យបណ្តឹងរបស់យុវជន ឈ្មោះ ស្រី ចំរើន ដែលបានប្តឹងកញ្ញាស្រីមុំថាកុហកពីខ្សែអាត់សំឡេង។ អយ្យការបន្ថែមថាខុម ចាន់តារាទី ជាបុគ្គលសំខាន់ក្នុងការផ្តល់ព័ត៌មានទាក់ទងនឹងសំណុំរឿងដែលកំពុងចាត់ការ។
បើតាមសេចក្តីថ្លែងការណ៍នោះ តុលាការបញ្ជាក់ថាស្រីមុំបានទទួលស្គាល់ថាពិតជាធ្លាប់មានទំនាក់ទំនងជាមួយលោក កឹម សុខា។ តុលាការបញ្ជាក់ថា៖ “ឈ្មោះខុម ចាន់តារាទី ហៅស្រីមុំ បានទទួលស្គាល់ថាសំឡេងក្នុងខ្សែអាត់ជាសំឡេងរបស់ខ្លួនហើយការដែលខ្លួនបដិសេធសំឡេងនេះកន្លងមក ដោយសារមានការណែនាំពីឈ្មោះ កឹម សុខា”។ តុលាការបន្ថែមថាទំនាក់ទំនងរវាងស្រីមុំនិងលោក កឹម សុខា មានការរៀបចំពីបុគ្គលមួយចំនួនដែលអយ្យការសាលាដំបូងរាជធានីភ្នំពេញកំពុងបន្តស៊ើបអង្កេតនិងស្រាវជ្រាវដើម្បីអនុវត្តតាមនីតិវិធីច្បាប់។
អយ្យការសាលាដំបូងរាជធានីភ្នំពេញបញ្ជាក់ថានឹងបន្តអនុវត្តការងាររបស់ខ្លួនប្រកបដោយភាពម៉ឹងម៉ាត់ ស្របតាមច្បាប់និងនីតិវិធីជាធរមាននិងបន្តផ្តល់ព័ត៌មានដល់សាធារណជនបានជ្រាបអំពីចំណាត់ការនិងការអនុវត្តនៃសំណុំរឿងនេះ។
វីអូឌីមិនអាចសុំការឆ្លើយតបពីលោក កឹម សុខា បាននៅឡើយទេ។
ព្រះរាជអាជ្ញារង លោក សៀង សុខ ដែលកាន់សំណុំរឿងនេះប្រាប់វីអូឌីកាលពីថ្ងៃអង្គារថាកញ្ញាស្រីមុំបានទទួលស្គាល់ថាខ្សែអាត់សំឡេងមួយចំនួនជារបស់នាង។ លោកបន្តថាតុលាការកំពុងពិនិត្យនីតិវិធីផ្លូវច្បាប់ដើម្បីមានចំណាត់ការបន្ត។ លោកមានប្រសាសន៍ថា៖ “នៅចំពោះមុខខ្ញុំគាត់បានឆ្លើយថាខ្សែអាត់មួយចំនួនដែលមានការសន្ទនាគ្នារវាងគាត់និងឯកឧត្តម កឹម សុខា ពិតជាសំឡេងគាត់និងឯកឧត្តម កឹម សុខា”។
សមត្ថកិច្ចបានស៊ើបអង្កេតសំឡេងខ្សែអាត់នេះ ក្រោយកញ្ញា ធី សុវណ្ណថា ដែលមានឈ្មោះល្បីលើប្រព័ន្ធសង្គមហ្វេសប៊ុក បានដាក់ពាក្យប្តឹងចង់ឲ្យសមត្ថកិច្ចស្រាវជ្រាវពីសំឡេងសន្ទនាស្នេហា ដោយថាចំណែកមួយនៃការសន្ទនាមានលក្ខណៈបរិហាកេរ្តិ៍ឈ្មោះនាង។
វីអូឌីមិនអាចសុំការបញ្ជាក់ពីកញ្ញា ខុម ចាន់តារាទី បាននៅឡើយទេ។ តែក្រោយការសាកសួរពីថ្ងៃអង្គារ នាងបានបដិសេធមិនឆ្លើយសំណួររបស់អ្នកសារព័ត៌មានទាក់ទងនឹងសំណួរថាតើខ្សែអាត់សំឡេងនោះជាសំឡេងរបស់ខ្លួនឬយ៉ាងណា។
មេធាវីរបស់ស្រីមុំ លោកស្រី ទ្រី ឈូន ប្រាប់អ្នកសារព័ត៌មានកាលពីថ្ងៃអង្គារថាលោកស្រីសង្ឃឹមថាកូនក្តីរបស់លោកស្រីនឹងមិនត្រូវបានតំណាងអយ្យការចោទប្រកាន់នឹងបទពេស្យាចារនិងការផ្តល់សក្ខីកម្មក្លែងក្លាយនោះទេ ដោយអះអាងថាតុលាការសួរពាក់ព័ន្ធតែសំឡេងខ្សែអាត់និងការទំនាក់ទំនងរបស់កូនក្តីប៉ុណ្ណោះ។ លោកស្រីមានប្រសាសន៍ថា៖ “ធម្មតាតែកាលណាមានបញ្ហាអីកើតឡើងមួយតុលាការគាត់ត្រូវតែស្វែងរកនូវបទល្មើសនោះហើយ អីចឹងហើយការកោះហៅនេះគឺមិនប្រាសចាកទេ សំខាន់តើតុលាការប្រើអំណាចក្នុងការចោទប្រកាន់ហ្នឹងត្រឹមត្រូវឬមិនត្រឹមត្រូវ អាហ្នឹងជាចំណុចដែលយើងត្រូវចាំមើល តែរហូតមកដល់ពេលនេះខ្ញុំសង្ឃឹមថាតុលាការនឹងមិនចោទប្រកាន់កូនក្តីរបស់ខ្ញុំទេ ព្រោះកូនក្តីខ្ញុំជាជនរងគ្រោះ “។
គួរបញ្ជាក់ថាកាលពីថ្ងៃទី១៧ ខែមីនា លោកនាយករដ្ឋមន្រ្តី ហ៊ុន សែន បានអះអាងថាលោកមានរូបភាពអ្នកនយោបាយល្បីឈ្មោះម្នាក់នាំនារីម្នាក់ទៅចូលសណ្ឋាគារមួយនៅទីក្រុងបាងកកប្រទេសថៃ។ ថ្វីត្បិតតែលោក ហ៊ុន សែន មិនបានបញ្ចេញឈ្មោះអ្នកនយោបាយនោះក៏ដោយតែមជ្ឈដ្ឋានជាច្រើនគិតថា លោកនាយករដ្ឋមន្រ្តីសំដៅដល់លោក កឹម សុខា ដែលកំពុងរងការចោទថាមានអាស្រូវស្នេហា។ លោកថ្លែងថា៖ ”មិនឈ្លោះ មិនឆ្លើយ មិនឆ្លង។ ប៉ុន្តែអ្នកដទៃទៀតវាឈ្លោះ វាឆ្លង វាឆ្លើយ បានរឿងវាកើត សូមផ្តាំទៅ! ទៅឆ្លើយថាទេ ខ្ញុំអត់ដែលមាន Passport ខាង Passport គេថាអ្នកឯងធ្វើ។ ថាខ្ញុំអត់ដែលទៅក្រៅប្រទេសអឺបាងកកអ៊ែវេមានសំបុត្រយន្តហោះជិះនៅព្រលានយន្តពោធ៍ចិនតុងមានថតរូបទុក នៅព្រលានយន្តហោះបាងកកមានទុក នៅសណ្ឋាគារបាងកកមានទុក។ ចប់បាត់មានស្អីទៀត”។
លោក ហ៊ុន សែន បន្តថាបើនៅតែចោទថារឿងនេះជាការរៀបចំដោយអ្នកនយោបាយ លោកបានព្រមានទៀតថារដ្ឋាភិបាលនឹងលូកដៃចាត់ការរឿងនេះ។ លោកព្រមានថា៖ ”នេះគ្រាន់តែបណ្តឹងរបស់ផ្នែកឯកជននិងឯកជនធ្វើការបរិហាកេរ្តិ៍បោកបញ្ឆោត។ ប៉ុន្តែតែរាលដាលដល់សភា ដល់រាជរដ្ឋាភិបាល គឺរដ្ឋាភិបាលបង្ខំចិត្តត្រូវធ្វើគឺធ្ងន់ហើយ…”។
នាយិកាអង្គការសីលការ លោកស្រី ធីតា ឃឹះ បានអំពាវនាវឲ្យអ្នកនយោបាយទាំងអស់ត្រូវមានទំនួលខុសត្រូវ កុំយកស្ត្រីធ្វើជាឈ្នាន់ក្នុងនយោបាយ។ លោកស្រីមានប្រសាសន៍ថា៖ “អ្នកនយោបាយខ្ញុំមិនដឹងថាខាងណាទេ ខ្ញុំមិនចង់ចង្អុលថាខាងណាទេ អ្នកនយោបាយយកស្រ្តីធ្វើជាឈ្នាន់ក្នុងល្បែងមួយដើម្បីផលប្រយោជន៍អីមួយយើងមិនដឹងទេប៉ុន្តែវាជារឿងឈ្នាន់ ចឹងទៅតួអង្គបុរសដែលពាក់ព័ន្ធក្នុងរឿងហ្នឹងទាំងអស់ហ្នឹងគឺមានកាតព្វកិច្ចដើម្បីចេញមក ដើម្បីបំភ្លឺ ដើម្បីកុំឲ្យស្រ្តីរងគ្រោះនៅក្នុងករណីហ្នឹង”៕
