អាជ្ញាធរប្រយុទ្ធប្រឆាំងគ្រឿងញៀនរបស់កម្ពុជានិងវៀតណាម សន្យាពង្រឹងកិច្ចសហប្រតិបតិ្តការបន្ថែមទៀត ក្នុងការទប់ស្កាត់ ការចរាចរណ៍គ្រៀងញៀនឆ្លងកាត់ប្រទេសទាំងពីរ ហើយវៀតណាមក៏យល់ព្រមជួយកសាងមជ្ឈមណ្ឌលជាតិស្តារនីតិសម្បទានិងបណ្តុះបណ្តាលវិជ្ជាជីវៈនៅកម្ពុជា។
ភាគីទាំងពីរកម្ពុជាដឹកនាំដោយលោក កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងសមភាគីរបស់លោកខាង វៀតណាមលោកវ៉ូ ឌឹកដាម បានជួបគ្នានៅទីក្រុងហាណូយ ពីថ្ងៃទី១៨ដល់ថ្ងៃទី២១ខែមេសា។នេះបើតាមការចុះផ្សាយរបស់អគ្គស្នងការដ្ឋាននគរបាលជាតិ
លោក កែ គឹម យ៉ាន បានថ្លែងប្រាប់ភាគីវៀតណាមថា កម្ពុជាស្ថិតនៅជិតតំបន់ត្រីកោណមាស ជាតំបន់ចរាចរណ៍គ្រឿងញៀនខ្លាំង ធ្វើកម្ពុជាងាយក្លាយជាប្រទេសរងគ្រោះ។
ក្នុងជំនួបនោះភាគីទាំងពីរបានឯកភាពគ្នា កសាងមជ្ឈមណ្ឌលជាតិស្តារនីតិសម្បទានិងបណ្តុះបណ្តាលវិជ្ជាជីវៈនៅកម្ពុជាដែលថ្នាក់ដឹកនាំរដ្ឋាភិបាលវៀតណាម បានឯកភាពជាមួយថ្នាក់ដឹកនាំនៃរដ្ឋាភិបាលកម្ពុជាក្នុងការជួយកសាងមជ្ឈមណ្ឌលនេះ ពង្រឹងកិច្ចសហប្រតិបត្តិការតាមព្រំដែន ចំណុចក្រោយភាគីវៀតណាមជួយបណ្តុះបណ្តាលពង្រឹងសមត្ថភាពមន្ត្រីកម្ពុជាលើការអនុវត្តច្បាប់ និង ការងារព្យាបាលស្តារនីតិសម្បទាអ្នកញៀនគ្រឿងញៀន៕
