អនុប្រធានាធិបតីអាមេរិកលោក Mike Pence នឹងធ្វើដំណើរទស្សនកិច្ចនៅព្រះវិហារឥស្លាមដែលធំជាងគេនៅលើពិភពលោកស្ថិតនៅក្នុងប្រទេសឥណ្ឌូនេស៊ីនៅថ្ងៃព្រហស្បតិ៍នេះ ដែលនេះជាកាយវិការបង្ហាញថា រដ្ឋការរបស់លោកត្រាំ កាន់បន្ថយការរើសអើងលើអ្នកកាន់សាសនាឥស្លាម។
លោក Pence នឹងទៅបំពេញទស្សនកិច្ចនៅព្រះវិហារឥស្លាម Istiqlal ហើយក្នុងឱកាសនោះនិងមានការពិភាក្សាលើប្រធានបទជាច្រើន។
ការធ្វើដំណើរបំពេញទស្សនកិច្ចរបស់លោក Pence នៅពេលនេះគឺ តំណាងឲ្យរដ្ឋការរបស់លោកត្រាំ ក្នុងការភ្ជាប់ទំនាក់ទំនងជាមួយសាសនាឥស្លាម ចាប់តាំងពីលោកត្រាំចូលកាន់តំណែងដូច កាលពីលោកបារ៉ាក់អូបាម៉ា និង ភរិយារបស់លោកទៅបំពេញទស្សនកិច្ចនៅទីនោះកាលពីឆ្នាំ២០១០ដែរ។
ប្រជាពលរដ្ឋឥណ្ឌូនេស៊ីប្រមាណ៩០% គឺស្មើនឹងប្រមាណ២៥៥លាននាក់ កាន់សាសនាឥស្លាម។ ឥណ្ឌូនេស៊ីគឺជាប្រទេសដែលកាន់សាសនាឥស្លាមធំជាងគេនៅលើពិភពលោក។
ក្រោយពេលឡើងកាន់តំណែងភ្លាមៗ លោកត្រាំ មានការព្រឈមមុខខ្លាំងជាមួយប្រទេសកាន់សាសនាឥស្លាម គឺបានហាមពលរដ្ឋពីប្រទេសចំនួន៧ដែលកាន់សាសនាឥស្លាម មិនឲ្យចូលអាមេរិក បំរាមនេះនាំឲ្យមានប្រតិកម្មយ៉ាងខ្លាំងពីប្រទេសកាន់សាសនាឥស្លាម៕