អេហ្ស៊ីបបន្ថែមកម្លាំង​ស្វែងរកយន្តហោះដែលបាត់​នៅមិនទាន់មានដំណឹង​

(រូបភាពពី CNA)

អេហ្ស៊ីបនិងប្រទេសជាមិត្តផ្សេងទៀតបានបន្ថែមកម្លាំងស្វែងរកយន្តហោះដឹកអ្នកដំណើរដែលបានបាត់កាលពីថ្ងៃព្រហស្បតិ៍ដែលរហូតដល់ពេលថ្ងៃសុក្រនេះនៅមិនទាន់មានដំណឹងនៅឡើយ។

ការស្វែងរកជាទ្រង់ទ្រាយធំនៅក្រោមផ្លូវដែលហោះហើរបានចាប់ផ្តើមតាំងពីថ្ងៃព្រហស្បតិ៍ម្សិលមិញក្រោយការបាត់យន្តហោះនោះដែលគេសង្ស័យថា យន្តហោះរបស់អេហ្ស៊ីបនេះបានធ្លាក់ចូលក្នុងសមុទ្រមេឌីទែរ៉ានេ ។

រដ្ឋមន្ត្រីអាកាសចរណ៍របស់អេហ្ស៊ីបបញ្ជាក់ថា មូលហេតុដែលយន្តហោះមានផ្ទុកមនុស្ស៦៦នាក់បានបាត់ពីរ៉ាដាភ្លាមៗពេលហោះហើរចេញពីប៉ារីសទៅទីក្រុងគែនោះ គឺពាក់ព័ន្ធនិងអំពើភេរវកម្មច្រើនជាងបញ្ហាបច្ចេកទេស។ នេះបើតាមសារព័ត៌មាន Channel News Asia។

ពេលនេះការព្រួយបារម្ភកើតមានខ្លាចដូចករណីក្រុមរដ្ឋឥស្លាមបាញ់ទម្លាក់យន្តហោះដឹកអ្នកដំណើររុស្ស៊ីដែលឆ្លងកាត់អេហ្ស៊ីបកាលពីខែតុលាឆ្នាំមុនទៀតដែលបានសម្លាប់មនុស្សអស់២២៤នាក់។

យន្តហោះរបស់អេហ្ស៊ីបនេះបានបាត់ការទាក់ទងនៅចន្លោះកោះរបស់ក្រិចនិងឆ្នេរសមុទ្ររបស់អេហ្ស៊ីបកាលពីម្សិលមិញ ដោយមិនបានឃើញបុគ្គលិកលើយន្តហោះបង្ហាញសញ្ញាទាក់ទងអ្វីទេ។

ពេលនេះទាំងអេហ្ស៊ីបនិងក្រិចបានប្រើប្រាស់យន្តហោះនិងនាវាស្វែងរកយន្តហោះដែលបាត់នោះរួមគ្នា។ គេរំពឹងថាក្រុមការងាររបស់បារាំងនឹងចូលរួមជួយ ខណៈអាមេរិកបានបញ្ជូលក្រុមការងាររបស់ខ្លួនទៅជួយស្វែងរកហើយ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ