យុទ្ធនាការឃោសនាបោះឆ្នោតក្រុមប្រឹក្សាឃុំ-សង្កាត់ បានចាប់ផ្ដើមនៅព្រឹកថ្ងៃនេះហើយ ដោយគណបក្សនយោបាយធំៗ បានប្រមូលសកម្មជន និងអ្នកគាំទ្ររបស់ខ្លួន ដើម្បីដង្ហែក្បួនឃោសនានៅទូទាំងប្រទេស។
នៅក្នុងរាជធានីភ្នំពេញ សកម្មជន និងអ្នកគាំទ្ររាប់ពាន់នាក់របស់គណបក្សប្រជាជនកម្ពុជា បានប្រមូលផ្ដុំគ្នានៅឯមជ្ឈមណ្ឌលកោះពេជ្រ។ នេះបើផ្អែកតាមទំព័រហ្វេសប៊ុករបស់លោកនាយករដ្ឋមន្ត្រី ហ៊ុន សែន ដែលបានផ្សាយបន្តផ្ទាល់អំពីការប្រមូលផ្ដុំនេះ។
ចំណែកទំព័រហ្វេសប៊ុកអតីតប្រធានបក្សប្រឆាំង លោក សម រង្ស៊ី ឯណោះវិញ បានបង្ហាញក្រុមសកម្មជន និងអ្នកគាំទ្រគណបក្សសង្គ្រោះជាតិក្នុងចំនួនដ៏ច្រើនកុះករ បានប្រមូលផ្ដុំគ្នានៅឯសង្កាត់ចាក់អង្រែក្រោម ក្នុងខណ្ឌមានជ័យ។
ការឃោសនាបោះឆ្នោត ត្រូវបានកំណត់ឲ្យធ្វើរយៈពេល១៤ថ្ងៃ មុនថ្ងៃបោះឆ្នោតក្រុមប្រឹក្សាឃុំ-សង្កាត់ ដែលគ្រោងធ្វើឡើងនៅថ្ងៃអាទិត្យ ទី០៤ មិថុនាខាងមុខនេះ។ សូមជម្រាបប្រិយមិត្តអ្នកស្ដាប់ថា នៅថ្ងៃវីអូឌីនឹងផ្សាយពិសេសអំពីយុទ្ធនាការឃោសនាបោះឆ្នោតរបស់គណបក្សនយោបាយនីមួយៗ៕
