ប្រធានាធិបតីហ្វីលីពីន លោក រ៉ូទ្រីហ្កូ ឌូទើតេ បានថ្លែងកាលពីថ្ងៃម្សិលមិញថា សមភាគីចិនប្រធានាធិបតី ស៊ី ជិនពីង បានព្រមានលោកថា នឹងមានសង្គ្រាម ប្រសិនបើក្រុងម៉ានីលព្យាយាមអនុវត្តតាមសេចក្ដីសម្រេចរបស់តុលាការអន្តរជាតិ និងខូងយកប្រេងនៅក្នុងតំបន់មានជម្លោះនៅសមុទ្រចិនខាងត្បូង។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
ក្នុងសុន្ទរកថាដែលអាចធ្វើឲ្យចិនមិនសប្បាយចិត្តនោះ លោក ឌូទើតេ បានថ្លែងវាយប្រហារទៅលើក្រុមអ្នករិះគន់ក្នុងស្រុក ដែលបាននិយាយថា លោក ឌូទើតេ មានជំហរទន់ជ្រាយជាមួយក្រុងប៉េកាំង ដោយមិនបានអនុវត្តតាមសេចក្ដីសម្រេចរបស់តុលាការមជ្ឈត្តកម្មអន្តរជាតិនៅទីក្រុងឡាអេ ដែលបានសម្រេចកាលពីឆ្នាំមុន ឲ្យហ្វីលីពីនឈ្នះក្ដីនោះ។
លោក ឌូទើតេ និយាយថា លោកបានពិភាក្សាជាមួយលោក ស៊ី នៅពេលមេដឹកនាំទាំងពីរបានជួបគ្នានៅទីក្រុងប៉េកាំង កាលពីថ្ងៃចន្ទកន្លងមក និងទទួលបានការព្រមានយ៉ាងមាំ ប៉ុន្តែ ប្រកបដោយមិត្តភាព៕