រដ្ឋមន្ត្រីការពារជាតិអាមេរិក លោក Jim Mattis បានថ្លែងកាលពីថ្ងៃម្សិលមិញថា ការប្រើប្រាស់កម្លាំងយោធាដើម្បីដោះស្រាយវិបត្តិកូរ៉េខាងជើង នឹងក្លាយទៅជាវិបត្តិដ៏អន្តរាយមានទំហំមិនអាចជឿបាន ហើយក្រុងវ៉ាស៊ីងតោនកំពុងធ្វើការជាអន្តរជាតិដើម្បីស្វែងរកដំណោះស្រាយផ្នែកកាទូត។ នេះដោយតាមការផ្សាយរបស់ទីភ្នាក់ងារព័ត៌មាន Reuters។
កូរ៉េខាងជើង មិនស្ដាប់ទៅនឹងការអំពាវនាវឲ្យបញ្ឈប់កម្មវិធីគ្រាប់មីស៊ីល និងនុយក្លេអ៊ែររបស់ខ្លួនឡើយ បើទោះបីជាការអំពានាវនោះធ្វើឡើងដោយប្រទេសចិនក៏ដោយ ដោយចាត់ទុកវាជាការការពារខ្លួនដោយស្របច្បាប់។
កូរ៉េខាងជើងកំពុងតែអភិវឌ្ឍគ្រាប់មីស៊ីលបំពាក់ដោយក្បាលគ្រាប់នុយក្លេអ៊ែរ ដែលអាចបាញ់ដល់ទឹកដីអាមេរិក ហើយក្រុមអ្នកជំនាញនិយាយថា ការសាកល្បងគ្រាប់មីស៊ីលថ្មីរបស់កូរ៉េខាងជើងកាលពីថ្ងៃអាទិត្យសប្ដាហ៍មុន គឺជាការបោះជំហានដ៏សំំខាន់មួយទៀតឆ្ពោះទៅរកគោលដៅនេះ។
លោក Mattis បានថ្លែងក្នុងសន្នីសីទសារព័ត៌មាននៅមន្ទីរបញ្ចកោណថា៖ “យើងកំពុងបន្តការងារលើបញ្ហានេះ។ ប្រសិនបើបញ្ហាឈានទៅប្រើកងទ័ព វានឹងក្លាយទៅជាវិបត្តិដ៏អន្តរាយមានទំហំមិនគួរឲ្យជឿ។ កិច្ចខិតខំប្រឹងប្រែងរបស់យើង គឺត្រូវធ្វើការជាមួយអង្គការសហប្រជាជាតិ ប្រទេសចិន ជប៉ុន និងកូរ៉េខាងត្បូង ដើម្បីព្យាយាមស្វែងរកច្រកចេញពីស្ថានភាពនេះ”។
សម្ដីនេះឆ្លុះបញ្ចាំងឲ្យឃើញច្បាស់ថា រដ្ឋបាលប្រធានាធិបតី ដូណាល់ ត្រាំ នឹងព្យាយាមស្វែងរកដំណោះស្រាយឲ្យអស់ពីលទ្ធភាព មុននឹងងាកទៅប្រើប្រាស់កម្លាំងទ័ព ដើម្បីបង្ខំកូរ៉េខាងជើង។
អាមេរិក ដែលមានកងទ័ពជិត ៣ម៉ឺននាក់នៅកូរ៉េខាងត្បូងដើម្បីការពារការគំរាមកំហែងពីកូរ៉េខាងជើងនោះ បានអំពាវនាវទៅចិន ឲ្យខិតខំបន្ថែមទៀតដើម្បីបញ្ឈប់កូរ៉េខាងជើង។
លោក Mattis ទំនងជាការពារកិច្ចខិតខំប្រឹងប្រែងរបស់ចិននាពេលថ្មីៗនេះ បើទោះបីជាលោកបានដឹងថា ក្រុងព្យុងយ៉ាងប្រឹងប្រែងដើរទៅមុខក៏ដោយ៕
