ព្រះរាជវាំងថៃបានប្រកាសថាក្រុមវេជ្ជបណ្ឌិតបានបង្ហូរទឹកចេញពីក្បាលដែលបានដាក់សម្ពាធលើខួរក្បាលរបស់ព្រះមហាក្សត្រ ភូមិបុល អាដុលយ៉ាតេជ។
ទីភ្នាក់ងារព័ត៌មាន AP ដែលបានដកស្រង់ខ្លឹមសារនៃសេចក្ដីប្រកាសព័ត៌មានពីព្រះបរមរាជវាំងនៅថ្ងៃអាទិត្យនេះបានរាយការណ៍ថាក្រុមវេជ្ជបណ្ឌិតពេញចិត្តទៅនឹងលទ្ធផលនៃការវះកាត់ដែលបានធ្វើឡើងកាលពីល្ងាចថ្ងៃសៅរ៍កន្លងមក។
សេចក្ដីប្រកាសព័ត៌មាននោះបាននិយាយថាការឆ្លុះត្រួតពិនិត្យនិងលទ្ធផលដទៃទៀតបានបង្ហាញថាការព្យាបាលកាលពីថ្ងៃទី០៧ ខែមិថុនានេះ ដើម្បីសម្អាតសរសៃឈាមនោះបានទទួលជោគជ័យ ដើម្បីធ្វើឲ្យសាច់ដុំបេះដូងរបស់ព្រះអង្គធ្វើចលនាឡើងវិញ។
ព្រះមហាក្សត្រ ភូមិបុល ដែលជាក្សត្រសោយរាជ្យសម្បត្តិយូរជាងគេនៅលើពិភពលោក បានសម្រាកព្យាបាលសុខភាពទាក់ទងនឹងជរាភាពរបស់ទ្រង់អស់រយៈពេលជាច្រើនឆ្នាំមកហើយ។ ទ្រង់ពុំបានបង្ហាញព្រះកាយជាសាធារណៈចាប់តាំងពីខែមករាកន្លងមក។
សុខភាពរបស់ទ្រង់គឺជាក្ដីកង្វល់សម្រាប់ប្រទេសថៃដោយសារទ្រង់ត្រូវបានប្រជាជនថៃចាត់ទុកជានិមិត្តរូបនៃស្ថិរភាពជាតិនៅក្នុងរជ្ជកាល៧០ឆ្នាំរបស់ទ្រង់។ បុត្រារបស់ទ្រង់ វជ្ជរ៉ាឡុងកន ពុំទទួលបានការគោរពដូចនឹងបិតាព្រះអង្គនោះឡើយ៕