ការបំផ្ទុះគ្រាប់បែកនៅកៀនផ្លូវពីសំណាក់ជនសង្ស័យជាជនបះបោរមូស្លីមនៅភាគខាងត្បូងថៃ បានសម្លាប់ទាហានថៃ ៦នាក់ និងទាហាន ៤នាក់ទៀតរងរបួស កាលពីថ្ងៃម្សិលមិញ នៅខេត្តផាត់តានី។ នេះដោយយោងតាមការផ្សាយរបស់សារព័ត៌មានបាងកក ដែលបានដកស្រង់សម្ដីតម្រួតថៃ។
ការបះបោរផ្ដាច់ខ្លួនមានអាយុកាលមួយទសវត្សរ៍មកនេះ នៅតាមខេត្តសម្បូរជនមូស្លីមនៅខេត្តយ៉ាឡា ផាត់តានី និងណារ៉ាធីវ៉ាត់ បានសម្លាប់មនុស្សដល់ជាង ៦៥០០នាក់ ចាប់តាំងពីឆ្នាំ២០០៤។
មេតម្រួតថៃប្រចាំខេត្តផាត់តានី បាននិយាយថា ការបំផ្ទុះគ្រាប់បែកថ្មីនេះ ត្រូវបានគេបង្កប់នៅលើផ្លូវមួយខ្សែ ហើយបានផ្ទុះឡើងនៅពេលទាហានបានធ្វើដំណើរទៅដល់អំឡុងពេលដើរល្បាត។
ពុំមាននរណាប្រកាសទទួលខុសត្រូវចំពោះអំពើហឹង្សានៅភាគខាងត្បូងប្រទេសថៃនោះឡើយ។
ការបំផ្ទុះគ្រាប់បែកបង្កប់នៅក្នុងរថយន្តកាលពីខែមុន ក៏បានបង្កឲ្យមនុស្សរាប់សិបនាក់រងរបួសផងដែរ នៅខាងក្រៅផ្សារទំនើបមួយកន្លែងនៅទីរួមខេត្តផាត់តានី៕