អង្គការសង្គមស៊ីវិលមួយចំនួនលើកឡើងថា ការប្រែប្រួលអាសនៈឃុំ-សង្កាត់អាណត្តិទី៤នេះ នឹងជំរុញឲ្យអ្នកនយោបាយប្រកួតគ្នាយកចិត្តពលរដ្ឋ ដើម្បីបានឈ្នះការបោះឆ្នោតជាតិឆ្នាំ២០១៨។
តាមលទ្ធផលក្រៅផ្លូវការ សម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៤នេះ គណបក្សប្រជាជន បាត់បង់តំណែង មេឃុំនិងចៅសង្កាត់សរុបអស់ជិត៥០០ ដែលចំនួននេះបានទៅលើគណបក្សសង្គ្រោះជាតិដែលជាបក្សប្រឆាំង។
នាយកប្រតិបត្តិនៃមជ្ឈមណ្ឌលសម្ព័ន្ធភាពការងារនិងសិទ្ធិមនុស្ស លោក មឿន តុលា លើកឡើងថា ការប្រែប្រួលអាសនៈនៅថ្នាក់ឃុំសង្កាត់អាណត្តិនេះ លោកថាពលរដ្ឋជាម្ចាស់ឆ្នោតបានផ្តល់ដំបូន្មានថ្មីមួយទៀត ដល់បក្សកាន់អំណាច បន្ទាប់ពីបោះឆ្នោតជាតិឆ្នាំ២០១៣ ឲ្យពង្រឹងប្រសិទ្ធភាពនៃការដោះស្រាយបញ្ហារបស់ពួកគេ និងថាក៏ការជាកាសាកល្បងទទួលយកគោលនយោបាយបណ្តោះអាសន្នរបស់បក្សប្រឆាំងដែរ។
លោក មឿន តុលា ឲ្យដឹងទៀតថា កត្តាអ្នកធ្លាក់សំឡេងគាំទ្រនិងអ្នកកើនសំឡេងនៅពេលនេះ នឹងជំរុញឲ្យពួកគេប្រកួតគេ ធ្វើកំណែទម្រុងយកចិត្តម្ចាស់ឆ្នោតកាន់តែខ្លាំង សម្រាប់ដណ្តើមកៅអីក្នុងរដ្ឋសភា ដើម្បីបានកាន់អំណាចនៅឆ្នាំក្រោយនេះ។
បើតាមលោក មឿន តុលា ផលប្រយោជន៍ដែលពលរដ្ឋទទួលបានពីការប្រកួតប្រជែងរបស់អ្នកនយោបាយ ពីពេលនេះរហូតឆ្នាំ២០១៨នោះ សេវាសាធាណៈលឿន គ្មានអំពើពុករលួយ គ្មានការបណ្តេញចេញទាំងបង្ខំ កាតម្លើងប្រាក់ឈ្នួលកម្មករ ប្រាក់ខែដល់មន្ត្រីរាជការ គ្រូបង្រៀន និងកំណែទម្រង់ប្រព័ន្ធយុត្តិធម៌ជាដើម។
លោកថា៖ «វិស័យកាត់ដេរមិនទាន់ដល់១៦០ដុល្លារ ប៉ុន្តែឥឡូវនេះឡើងដល់១៥៣ដុល្លារ។ ដូចនេះយើងឃើញថាជាគោលនយោបាយ របស់គណបក្សប្រឆាំងដែលបានដាក់កាលពីឆ្នាំ២០១៣កាលពីបោះឆ្នោតជាតិ។ប្រទេសប្រជាធិបតេយ្យគឺអញ្ចឹងឯង គេចង់ឲ្យអ្នកនយោបាយប្រកួតប្រជែងគ្នាដោយគោលនយោបាយ ដល់ផលចំណេញ បានទៅលើប្រជាពលរដ្ឋ មិនមែនផលចំណេញបានទៅលើអ្នកនយោបាយមួយពីរនោះទេ»។
អ្នកវិភាគនយោបាយវ័យក្មេង លោក ឆាំ ប៊ុនថេត លើកឡើងថា ចាប់ពីបោះឆ្នោតជាតិឆ្នាំ២០១៣មក បក្សកាន់អំណាច បានប្រឹងធ្វើកំណែទម្រង់ ជាច្រើន ដូចជាកំណែទម្រង់សេវាសាធាណៈ តម្លើងប្រាក់ឈ្នួលកម្មករក្នុងវិស័យកាត់ដេរ វិស័យសុខាភិបាល មន្ត្រីរាជការ និងថាថ្មីៗនេះបានប្រប្រាសតម្លើងប្រាក់ខែ ដល់មន្ត្រីឃុំ សង្កាត់ ជាដើម បើទោះបីកំណែទម្រង់នោះមិនទាន់ឆ្លើយតបនឹងបញ្ហាពលរបស់ពលរដ្ឋក៏ដោយ។
លោក ឆាំ ប៊ុនថេត វិភាគថា ការប្រែប្រួលអាសនៈឃុំ សង្កាត់នៅពេលនេះ ហាក់បានបង្ហាញថា កំណែទម្រង់កាន់តែមានសន្ទុះ នៅពេលបក្សកាន់អំណាចកាន់តែធ្លាក់ចុះប្រជាប្រិយភាព។
លោកថា៖ «ដល់ពេលសំឡេងមួយ នៅប្រកៀកប្រកិត[ជិតទាន់]គ្នាអញ្ចឹងខ្ញុំថាធ្វើការងារមានប្រយោជន៍ច្រើន សម្រាប់សង្គម។ ដូច្នេះល្អ ប្រសិនបើជាបន្តិចទៀតទៅមានបក្សទី៣និងទី៤មកឈ្នះឆ្នោតបំបែកកៅអីបានខ្លះ ហើយបំបែកកៅអីបក្សធំៗទាំងពីរនោះ ជាបីហើយកុំឲ្យបក្សទាំងពីរហ្នឹងបានសំឡេងស្នើហ្នឹង៥០ភាគរយបូក១ខ្ញុំថាខ្មែររិតតែមានប្រយោជន៍ជាងហ្នឹងទៀត»។
នាយកប្រតិបត្តិមជ្ឈមណ្ឌលប្រជាពលរដ្ឋដើម្បីអភិវឌ្ឍនិងសន្តិភាព លោក យង់ គិមអេង លើកឡើង ប្រហាក់ប្រហែលដែរថា ការប្រែប្រួលអាសនៈនៅឃុំ សង្កាត់ពេលនេះ លោកថាជាបទពិសោធ របស់បក្សកាន់អំណាច ក្នុងការពង្រឹងប្រសិទ្ធភាពដោះស្រាយ ដើម្បីឆ្លើយតបទៅនឹងបញ្ហា របស់ម្ចាស់ឆ្នោត។
លោកថា៖ «ការប្រែប្រួលអាសនៈហ្នឹងកម្រិតនៃការប្រកួតប្រជែងវាកាន់តែខ្ពស់។ កាលណាកម្រិតប្រកួតប្រជែងហ្នឹងកាន់តែខ្ពស់វាធ្វើឲ្យគណបក្សនយោបាយដែលចូលរួមប្រកួតប្រជែងហ្នឹងគាត់ប្រឹងប្រែងធ្វើយ៉ាងណាដោះស្រាយបញ្ហារបស់ពលរដ្ឋហ្នឹង ដើម្បីទាក់ទាញប្រជាប្រិយភាពសម្រាប់ការបោះឆ្នោតជាតិ និងការបោះឆ្នោតក្រុមប្រឹក្សាខាងមុខ[២០២២]ទៀត»។
យ៉ាងនេះក្តី អ្នកវិភាគលើកឡើងថា ការស្តាប្រជាប្រិយភាព របស់បក្សកាន់អំណាចឡើងវិញ ពួកគេថា គឺការធ្វើកំណែទម្រង់ប្រព័ន្ធយុត្តិធម៌ដពិតប្រាកដមួយ ដោយថាមិនត្រូវចាប់អ្នកគ្មានកំហុស យកទៅដាក់គុក ក្រោមហេតុផលនយោបាយ ការដោះលែងមន្ត្រីការពារសិទ្ធិមនុស្ស មន្ត្រី គជប និងមន្ត្រីបក្សប្រឆំាងមួយចំនួន ដែលកំពុងជាប់ឃុំ ជាដើម៕